Qoǵam • 24 Aqpan, 2020

Telearna jumysynyń esebi tyńdaldy

20 retkórsetildi

«Qazsport» telearnasynyń ótken jylǵy atqarǵan ju­mys­tarynyń esebi tyńdaldy. Is-sharaǵa Aqparat jáne qoǵamdyq damý mınıstri D.Abaev, «Qazaqstan» RTRK» AQ basqarma tóraıymy L.Tanys­baı, «Qazsport» tele­arna­synyń dırektory P.Sybýlın, Ulttyq Olımpıada komıtetiniń bas hatshy­sy S.Musaıbekov, Ulttyq sport túrleri qaýymdastyǵynyń prezıdenti B.Tileý­han jáne ózge de sporttyq federasııalar men uıymdardyń ókilderi qatysty.

 

Arnanyń 70 paıyz ónimi sporttyq translıasııalardan tursa, 20 paıyzy baǵ­darlamalar men jobalardy quraı­dy. Telearna ótken jyly Azııa-Tynyq muhı­ty habar taratýshylarynyń odaǵyna (ABU) kirdi. Uıymǵa 76 elden 272 adam múshe­lik etedi.

Sonymen qatar Qoǵamdyq keńes oty­ry­synda 2020 jylǵy Tokıo Olımpıa­dasynyń translıasııasyn uıymdas­ty­rý máseleleri talqylandy. 2020 jylǵy Jazǵy Olımpııa oıyndaryna Qa­zaqstan ázirge 29 lısenzııa ıelendi.

«Qazaqstanda «Qazsport» arnasyn kórmeıtin birde-bir adam joq. 2020 jylǵy Tokıo Olımpıadasynyń kórse­ti­limin de joǵary deńgeıde uıymdas­ty­rýdy qamtamasyz etý qajet. Bıylǵy Olımpııa oıyndaryna qatysatyn sportshylardyń 80 paıyzy – jastar. Bul – elimizdegi ózge de jastar arasynda sportty nasıhattaýdyń birden-bir joly», dedi óz sózinde Aqparat jáne qoǵamdyq damý mınıstri D.Abaev.

«Ulttyq sport túrlerin nasıhattaýda «Qazsport» arnasynyń róli zor. Qaı jaǵynan bolsyn qoldaý taýyp jatyr. Qazir arna ulttyq sport túrlerin ózge elde kórsetý boıynsha bastama kóterýde. Bul – quptarlyq másele. Qaýymdastyq tarapynan jobalar usynýǵa daıynbyz», dedi Ulttyq sport túrleri qaýymdastyǵynyń prezıdenti B.Tileýhan.

Qoǵamdyq keńes qatysýshylary otyrys barysynda odan bólek, ult­tyq sport túrleri men buqaralyq sportty damytý jáne nasıhattaý, qa­zaqstandyq kommentatorlar mektebin uıymdastyrý, elimizdegi sport jýr­nalısteriniń mektebin qalyptastyrý týraly pikirleri men usynystaryn bil­dirdi.

 

 

Sońǵy jańalyqtar

Uqsas jańalyqtar