Úkimet • 25 Aqpan, 2020

Sý basý qaýpi týraly halyqty habardar etý boıynsha reıdtik is-sharalar júrgizilýde

14 retkórsetildi

Úkimettiń baspasóz ortalyǵynda ótken baspasóz konferensııasynda Ishki ister mınıstriniń orynbasary Iýrıı Ilın sý tasqyny kezeńine daıyndyq týraly aıtyp berdi. Bul týraly Premer-Mınıstrdiń baspasóz qyzmeti habarlady.

«Biz kóktemgi-sý tasqyny kezeńine daıyndyqtyń belsendi kezeńine óttik. Búgin tańǵy saǵat 6-dan beri respýblıka boıynsha biz «Kóktem-2020» keshendi komandalyq-shtabtyq oqý-jattyǵýlaryn bastadyq, onda jergilikti atqarýshy organdardyń kúshteri men quraldarynyń, sondaı-aq IIM bólimsheleriniń kóktemgi-sý tasqyny kezeńinde TJ-ǵa áreket etýge daıyndyǵy tekseriledi», — dep atap ótti Iý. Ilın.

Osy jyldyń 1 aqpanyndaǵy qardyń jınalý boljamyna súıene otyryp, QR IIM TJ týyndaý qaýpi joǵary ýchaskelerdi anyqtady. Bul — 600-den astam eldi meken.

«Qazir bizdiń bólimshelerimiz ákimdiktermen birlese otyryp, sý basý aımaǵynda qalýy múmkin halyqty habardar etip, reıdtik is-sharalar júrgizip jatyr. Bundaı jaǵdaıda ózin qalaı ustaý kerektigi týraly usynystar beremiz», — dedi Iý. Ilın.

Osy jyldyń 1 naýryzynda «Kazgıdromet» AQ tolyq naqty boljamdy usynady. Odan keıin Ishki ister mınıstrligi qardyń kóp jaýýy baıqalatyn ýchaskelerdegi oqıǵalarǵa qatysty yqtımal nusqalardy pysyqtaýdy josparlap otyr. 

Iý. Ilınniń aıtýynsha, 26-27 aqpanǵa qatysty túsken daýyl eskertýleri, onyń ishinde Nur-Sultan qalasynda jel jyldamdyǵynyń kúsheıýi, jańbyr túrinde jaýyn-shashynnyń jaýýy boıynsha eskertýler qardyń erte eriýine sebep bolmaq.

«Kópjyldyq baqylaýlarǵa qaraǵanda kóktem mezgili áldeqaıda erterek keledi dep boljap otyrmyz. Naýryz aıynyń ortasy negizgi sharyqtaǵan shaǵy bolady dep oılaımyn. О́tken jylmen salystyrǵanda kóktemgi kezeń eki-úsh apta buryn bastalady», — dedi Iý. Ilın.

Vıse-mınıstrdiń aıtýynsha, eń úlken qaýip Qaraǵandy oblysynda Nura ózeniniń saǵasynda belgilengen, onda úlken qar qory qalyptasyp, topyraqtyń tereń qatýy baıqalady, bul sýdyń joǵary aǵynyn, Nura ózeninde joǵary sý tasqynynyń paıda bolýyn týdyrýyna ákelýi múmkin. 

Qar qory boıynsha da Vıachaslav sý qoımasynyń tolý qaýpi bar.

«Tıisinshe, qyzmetkerler Astanalyq kontr retteýishine jumys isteıtin bolady, bul Nur-Sultan qalasyn tym kóp erigen qar sýynan qorǵaýǵa jáne Esil ózeni boıymen sýdyń ári qaraı aǵýyna múmkindik beredi», — dedi vıse-mınıstr. 

Sonymen qatar Aqmola oblysyndaǵy Jabaı jáne Kolýton ózenderi boıynda da sý basý qaýpi bar. Atbasar jáne Kolýton eldi mekenderine osy ózenderdiń saldarynan sý basy qaýpi tónip tur.

Budan keıin eń kóp júkteme Soltústik Qazaqstan oblysynyń aýmaǵyna túsetin bolady, Aqmola oblysynyń aýmaǵyndaǵy barlyq ózender osy óńirge jetip, Sergeev sý qoımasy ózeniniń saǵasyna jetedi, al bul saǵa rettelmeıdi. 

Sonymen qatar Iýrıı Ilın Nur-Sultan qalasyn sý basý qaýpi týraly aıtyp berdi.

«Biz bárimiz, Nur-Sultan qalasynyń turǵyndary, bıyl qar kóp mólsherde jaýǵanyn bilemiz. Qazgıdromettiń boljamynsha, bul normadan eki eseden astamǵa artyq. Kóshelerden, aýlalardan qar shyǵarý jumystary júrgizilýde. Árbir turǵyn bul jumystardyń qarqyndy júrgizilýin qalaıdy, sebebi, kóktemniń shyǵýyna az ýaqyt qaldy», — dedi Iýrıı Ilın.

Mınıstrdiń orynbasary bıyl aqpan aıynda Nur-Sultan qalasynda aýa temperatýrasy kóterilip, jańbyr men qar jaýǵanda keı jerlerdi sý basqanyn atap ótti.

«Bizde kósheniń bir bóligi sý astyna ketti. Ákimdik qazir boljap otyrǵan kúrdeli jaǵdaı ózenniń tómengi bóliginde, ózen ańǵarynda, qaladan tys, saıajaılar ornalasqan jerde oryn alýy múmkin. Sý basýy yqtımal. Sonymen qatar aǵyn sýlar káriziniń jumysyn jolǵa qoımaǵan aýmaqtar – B. Momyshuly dańǵyly, Turan kóshesiniń boıy. Bul ýchaskelerde problema bar. Saldaryn joıý úshin TJK tarapynan kómek kórsetiletin bolady», — dedi Iý. Ilın.

Sý resýrstary komıteti Nura ózeniniń baǵytyna qaraı kontr retteýishten shyǵaryndy kanalyn salý jobasyn usyndy.

«Ýchaskeler Nur-Sultan qalasynda belgilengen. Ákimdik sý basqan aımaqta qalýy múmkin turǵyndardy qulaqtandyrý sharalaryn júrgizip jatyr. Qajet bolǵan jaǵdaıda, olardy evakýasııalaıtyn bolamyz», — dedi Iýrıı Ilın.

Mınıstrdiń orynbasary tótenshe jaǵdaılardyń týyndaý qaterin tómendetý jónindegi Jol kartasynyń iske asyrylýy týraly aıtyp berdi. Jol kartasy aıasynda barlyq óńirler boıynsha 600 is-shara josparlanǵan. Jol kartasyn jalpy qarjylandyrý kólemi 130 mlrd teńgege jýyq: 78 mlrd teńge – respýblıkalyq bıýdjetten, 50 mlrd teńgege jýyǵy – jergilikti bıýdjetten. 

Jalpy, barlyǵy 400-ge jýyq is-shara júzege asyryldy. 36 sharanyń iske aspaý qaýpi bar. Olar birqatar obektıvti sebepterge baılanysty ótken jyly iske asyrylmaı qaldy. Premer-Mınıstr 2019 jyly iske aspaı qalǵan sharalardy iske asyrý jáne 2020 jyly qalǵandaryn aıaqtaý týraly tapsyrma bergen. 

Iý. Ilın Jol kartasyna iske asyrýdyń zor tıimdiligi bar ekenin atap aıtty.

«О́tken jyly bizde sý basqan 1000 eldi meken boldy. Qazir biz ondaı qaterdi azaıttyq. Qazir 350-den az eldi mekende sý basý qaýpi bar», — dedi vıse-mınıstr.

Sońǵy jańalyqtar

Jetisaılyq jomart jandar

Aımaqtar • Keshe

Ishan baǵy qaıta qalpyna keledi

Rýhanııat • Keshe

? (Suraq belgisi) Poema

Ádebıet • Keshe

Senzýrasyz Abaı

Rýhanııat • Keshe

Uqsas jańalyqtar