Tokıo Olımpıadasy qarsańyndaǵy aımaqtyq lısenzııalyq týrnır Qytaıdyń Sııan qalasynda ótýi tıis bolatyn. Alaıda, Qytaıdaǵy koronavırýstyń órshýine baılanysty kúres básekesi Qyrǵyzstannyń Bishkek qalasyna aýystyryldy.
«Týrnırdiń bastalýyna azǵantaı ýaqyt qalǵanda ótetin oryndy aýystyrý sportshylarǵa ońaı soqpasy anyq. Alaıda, biz úshin atletterdiń densaýlyǵy mańyzdy. Sol úshin biz osyndaı qadamǵa baryp otyrmyz. Osy oraıda, dereý qoldaý kórsetken Qyrǵyzstan tarapyna alǵysymyz sheksiz», - deıdi UWW prezıdenti Nenad Lalovıch.
Lısenzııalyq jarysqa qatysatyn qytaılyq balýandar bul kúnderi Serbııada jattyǵýda. Olar Qytaıdan shyǵar kezde úlken tekserýden ótip, Serbııada dárigerler baqylaýynda boldy. Búginde olarǵa jattyǵý úshin bar jaǵdaı jasalýda. Kúres túrlerinen Azııa aımaqtyq lısenzııalyq týrnır 2020 jyldyń 27-29 naýryzy aralyǵynda Bishkekte ótedi.
