Esterińizde bolsa, 2014 jyly Ýkraınanyń ońtústik-shyǵysyndaǵy birqatar aımaqta separatıster bas kóterip, ákimshilik ǵımarattardy basyp alǵan-tuǵyn. Shetelden kelgen qarý-jaraqpen olar keıinirek referendým ótkizgenin jeleý etip, Lýgansk halyqtyq respýblıkasyn (LNR) jáne Donesk halyqtyq respýblıkasyn (DNR) jarııalady. Memleket ishinen memleket jarııalaǵandarǵa Ýkraına qarýly qarsylyq kórsetken. Alaıda qaıdan kelgeni belgisiz áskerı tehnıkamen jaraqtanǵan separatıster boı bermedi. Osylaısha, óńirdegi jaǵdaı shıelenisip, áli kúnge deıin jalǵasyp keledi.
Harkovta, Doneskte, Lýganskidegi bolǵan soǵys saldarynan 13 myńǵa jýyq adam qaza taýyp, 30 myńnan astamy jaraqattandy. Eki mıllıonǵa jýyq turǵyn úıin tastap, bosqyn atandy.
Halyqaralyq qoǵamdastyq ta, Ýkraına da Donesk pen Lýganskidegi qaqtyǵysqa Reseıdi kinálap, ózge eldiń ishki tirligine aralasyp, qarýly kómek kórsetti dep esepteıdi. Alaıda Kreml atalǵan aıyptaýlardyń bárinen bas tartyp, separatısterge qolushyn sozbaǵanyn málimdedi.
Joǵarydaǵy jaǵdaıǵa qaıta oralsaq. О́tken aptada bolǵan qaqtyǵystan Ýkraına shekara qyzmetiniń bir sarbazy qaza taýyp, birnesheýi jaralandy. Qarýly kúshterdiń baspasóz qyzmeti Kıevtiń qaramaǵyndaǵy aımaqta ornalasqan shektesý pýnktine birneshe separatıst shabýyl jasap, keri shegingenin habarlady. Sondaı-aq aýyr artıllerııa qoldanylǵanyn jetkizdi.
Ýkraına qarýly kúshteriniń basshysy, general-polkovnık Rýslan Homchaktyń aıtýynsha, qaqtyǵys kezinde 4 separatıst oqqa ushyp, 6-ýy jaralanǵanyn málimdedi. Qolbasshynyń sózine súıensek, shabýyl jasamastan buryn artıllerııalyq soqqy jasalǵan. «Qarsylastar eń áýeli kameralardy joıyp jiberdi. Ne bolyp jatqanyn tirkep otyrý úshin barlyq jaqqa kamera ornatylǵan. Olar eń áýeli solardy joıyp jiberdi», dedi R.Homchak.
Alaıda Lýgansk aımaǵyndaǵy separatıster bıligi qaqtyǵysqa Ýkraınany kinálap otyr. Olardyń aıtýynsha, birneshe ýkraınalyq sarbaz shektesý pýnktin kesip ótpek bolǵan. Ýkraına prezıdenti Vladımır Zelenskıı osy oqıǵaǵa baılanysty pikir bildirip, qaqtyǵysty beıbitshilik jónindegi kelisimge kedergi keltirý dep esepteıtinin jetkizdi. Áıtse de memleket basshysy shabýyldy kim uıymdastyrǵany jóninde tis jarǵan joq.
«Áskerimizdiń áleýeti myqty ekenin aıtqym keledi. Arandatý bolady. Áskerimiz laıyqty jaýap berdi. Oqıǵa tolyqtaı baqylaýymyzda», dedi ol. Ýkraınanyń syrtqy ister mınıstri Vadım Prıstaıko BUU Bas assambleıasyna Donesk jáne Lýgansk oblystaryna bitimgerler áskerin engizýdiń ýaqyty kelgenin aıtyp, ótinish jasady.
Shektesý pýnktindegi qaqtyǵystan keıin Reseı men Ýkraına buqaralyq aqparat quraldary arasynda aqparattyq shabýyl burq ete tústi. Máselen, reseılik «Vzglıad» gazeti «Kıev Máskeýdi Donbasta soǵysýǵa shaqyrady» dep maqala jazsa, liga.net portaly Donbastaǵy qaqtyǵysqa Kreml tapsyrys bergenin jazady.
AQSh memlekettik departamentiniń baspasóz hatshysy Morgan Ortagýs týıtterdegi paraqshasynda «AQSh tarapy Ýkraınaǵa qarsy Reseıdiń keıingi agressııasyn aıyptap, áriptesteri men odaqtastaryn qoldaıdy. Biz prezıdent Zelenskııdiń beıbitshilik ornatý áreketin qoldaımyz jáne Mınsk kelisimine sáıkes oq atýdy dereý toqtatýǵa shaqyramyz», dep jazdy.
EQYU-nyń Ýkraınadaǵy arnaıy mıssııasy oqıǵa ornyna baryp, jaǵdaıdy baqylap qaıtty. Olardyń kúndelikti qorytyndysyna súıensek, aımaqta 2500-den astam bomba jarylǵan. Sondaı-aq qaqtyǵys bolǵan jerden eki taraptan da birneshe áskerı tehnıkany baıqaǵan.
