Árıne, qylmyskerler anaý aıtqandaı ákki baýkespeler emes, qatardaǵy qaskúnemder. Biraq solardyń ózi keıde ustatpaı, san soqtyryp ketedi emes pe? Ásirese, qoldan julyp áketetin telefondardyń zardaby aýyr. Ondaıda zardap shegýshi telefonynyń qunyna emes, urynyń basynǵan qasiretine qaradaı kúıinedi. Jeksenbi kúni de dál sondaı oqıǵa bolǵan.
Petropavl qalasynyń kóshelerinde qazir qol kóterip taksı toqtatý múmkin emes, tek qana shaqyrý kerek. Qalany óte «yńǵaısyz» shaharǵa aınaldyryp jibergen pysyqtar osyndaı kesirttikti oılap tapqan. Keshki saǵat altynyń shamasynda taksı shaqyrtpaqshy bolyp, telefonyn qolyna alǵan 61 jastaǵy áıel adamnyń qolynan qaskúnem ony julyp áketip, qasha jóneledi. Quny 25 myń teńge turatyn Nokia telefonynan aırylǵanyna emes, qarajúrektiń aıdyń-kúnniń amanynda basynǵanyna qaradaı kúıingen áıeldiń qaıǵysyna ótip bara jatqan taǵy bir áıel adam ortaqtasyp, dereý polısııaǵa habarlasady. Ol tipti jedel kelgen patrýldik polısııa qyzmetkerlerine qaskúnemniń túr-sıpatyn, qashqan baǵytyn da aıtyp beredi. Osynyń arqasynda polıseıler kúdiktini eki-úsh kóshe aınalyp ótpeı jatyp, 10 mınýttyń ishinde ustaǵan.
Jas bala-shaǵa emes, 42 jasqa kelgenshe aqyl-esi jetilmegen kúdiktige qazir bultartpaý sharasy belgilenip, Qylmystyq kodekstiń «Tonaý» baby boıynsha sotqa deıingi tergep-tekserý amaldary júrgizilýde.
Kelesi tonaý dúısenbi kúni tańerteń oryn alǵan. Tańǵy saǵat 05.30-da kóshedegi dúńgirshekterdiń birindegi 57 jasar satýshy aýystyrýǵa kelgen áriptesi eken degen oımen qaǵylǵan esikti ashqan. Sóıtse, kelip turǵan ishimdikke toıyp alǵan belgisiz er adam eken. Satýshyny qorqytqan ol 15 qorap temeki men kassadaǵy 37 700 teńgeni qoldy qylǵan. Satýshy polısııaǵa habarlap, qaskóıdiń erekshe belgilerin aıtqan. Shabýyl faktisi boıynsha polısııanyń keshendi kúshteri jumyldyrylyp, maskúnemdi tez arada quryqqa túsirdi. Ol buryn birneshe ret isti bolǵan 1991 jyly týǵan qala turǵyny bolyp shyqty. Bul fakti boıynsha Qylmystyq kodekstiń qyzmettik úı-jaıǵa zańsyz kirip, tonaýshylyq jasaǵan degen baby boıynsha is qozǵaldy. Qazir kúdiktige qatysty qamaýǵa alý túrindegi bultartpaý sharasy qoldanylǵan. «Eger, siz tonaýshylardyń qurbanyna aınalǵan bolsańyz, qarsylyq kórsetpeı, tek bas salǵan adamnyń erekshe belgilerin este saqtap, oryn alǵan oqıǵa jaıly dereý polısııaǵa habarlaǵanyńyz durys», dep keńes beredi Petropavl qalasy PB bastyǵy, polısııa polkovnıgi Jandos Muqatov.
Ashylǵan ekeýine deıingi úshinshi qylmys qańtar aıynyń basynda, saǵat 10 shamasynda Áýezov kóshesiniń boıyndaǵy bir úıdiń aýlasynda bolyp, onda 1937 jyly týǵan qala turǵyny tonalǵan edi. Onyń paketinde somasy 5 myń 700 teńgeniń zaty bolǵan. Mine, osy qylmys beınekameralarǵa túsip qalǵan kórinisterdiń kómegimen jan-jaqty júrgizilgen jumystyń nátıjesinde jýyrda ashyldy. Qazir buryn qylmystyq jaýapkershilikke tartylǵan 29 jastaǵy kúdikti ustalǵan.
PETROPAVL
