«Qazirgi ýaqytta Nur-Sultan qalasynda 2 myńnan astam jarnama qurylymy bar. Iаǵnı olardyń qataryna bılbordtar, afıshalar, LED ekrandar, aıaldama keshenderi kiredi. Naqtyraq aıtsam, qalada 95 LED ekran bar. Bir ókinishtisi, sońǵy ýaqytta zańsyz nemese tıisti organdardan kelisim almaı ilingen jarnamalar kóbeıip barady», – dep Qoǵamdyq damý isteri basqarmasynyń basshysy Talǵat Rahmanberdi qaladaǵy negizgi problemalardyń biriniń basyn ashty.
Kezdesý barysynda sóz alǵan Nur-Sultan qalasy ákimdiginiń Onomastıkalyq jumys jáne memlekettik rámizder bóliminiń basshysy Gúljan Qurmanǵalıqyzy zańsyz ári qatege toly jarnamalar úshin aldaǵy ýaqytta salynatyn aıyppul týraly túsindirip berdi.
«Biz jarnama agenttikteri bergen mátinderdi tekserip, kelisim beremiz. Ákimshilik-quqyqbuzýshylyq kodeksiniń 455-babyna sáıkes aıyppul salý isi qarastyrylǵan. Atalǵan baptyń 3-tarmaǵy boıynsha QR zańdaryna jarnama taratý tilderine belgilengen talaptardy buzý jeke tulǵalarǵa 20 AEK, laýazymdy tulǵalarǵa 70 AEK, shaǵyn kásipkerlik sýbektilerine nemese kommersııalyq uıymdarǵa 100 AEK, orta kásipkerlik sýbektilerine 150 AEK, al iri kásipkerlik sýbektilerine 400 AEK kóleminde aıyppul salynady. Osyǵan oraı Til týraly zańnyń 21-babyna sáıkes kez kelgen aqparat (onyń ishine jarnama da kiredi) memlekettik tilde jáne orys tilinde bolýy tıis», – dep Gúljan Qurmanǵalıqyzy jarnama agenttiginiń ókilderine eskertý jasady.
Jıyn barysynda sóz alǵan Nur-Sultan qalalyq Polısııa departamentiniń Esirtki qylmysyna qarsy is-qımyl basqarmasynyń bólim bastyǵy Sergeı Ilınyh sońǵy ýaqytta jarnama bılbordtary arqyly esirtki saýdasy jarnamalanyp ketken sátter bolǵanyn jetkizdi.
«Esirtki bıznesi óz qylmysyn jarnamalaý úshin aqparattyq tehnologııalardy qoldanýda. Osy maqsatta ınternet resýrstaryn, túrli messendjerlerdi paıdalanady», – deıdi Sergeı Ilınyh.
Ol óz sózinde 2019 jyldyń 27 jeltoqsanynan bastap arnaıy zań jobasy engizilgenin, onyń negizinde esirtki nemese soǵan uqsas ónimderdi nasıhattaǵan, jarnamalaǵan azamattar úsh jylǵa deıin, al BAQ betterinde nemese ózge de quraldarda jarııalaǵandarǵa 6 jylǵa deıin bas bostandyǵynan aıyrý jazasy qarastyrylǵanyn jetkizdi. Basqosýda Qoǵamdyq damý isteri basqarmasynyń basshysy Talǵat Rahmanberdi jarnama agenttikterine 2020 jyldyń 3 naýryzyna deıin jarnamalyq nysandardyń estetıkalyq túrin qalpyna keltirý, sondaı-aq, «Jarnama týraly», «Til týraly» zańdardy, QR basqa da normatıvtik aktilerin saqtaý týraly tapsyrma berdi. Kezdesý sońynda Qoǵamdyq damý isteri basqarmasynyń basshysy Talǵat Rahmanberdi mundaı qıyndyqtar, zańsyz áreketterdi boldyrmaý úshin birlesip jumys jasaýǵa shaqyrdy.
