Qazaqstan Respýblıkasynyń Ulttyq kitaphanasy Reseıdiń Bas konsýldyǵy jáne Almaty qalasyndaǵy Reseı yntymaqtastyǵy ókildigimen birlesip uıymdastyrǵan aıtýly sharanyń basty maqsaty – Otanǵa degen mahabbattyń, eńbekqorlyq pen janqııarlyqtyń, birlik pen tutastyqtyń arqasynda Dostastyq memleketteriniń beıbitshiligin, bostandyǵy men táýelsizdigin qamtamasyz etken azamattardyń erligine taǵzym etý.
Jıynda alǵashqy bolyp sóz alǵan Ulttyq kitaphananyń dırektory Baqytjamal Ospanova «Bıyl Uly Jeńistiń 75 jyldyǵy el elde, jer-jerde keńinen atalyp ótýde. Bul – Qazaqstan jáne burynǵy TMD elderi úshin ortaq mereke. Sol surapyl soǵys kezindegi otandastarymyzdyń erligi keıingi urpaqtyń jadynda máńgi saqtap qalý úshin osyndaı sharalardy jıi uıymdastyryp turý qajet. Tórt jylǵa sozylǵan qan maıdanǵa Qazaqstannan 1,2 mıllıonnan asa adam attandy. Sonyń árbir tórteýi qaza tapty. Kózsiz erlik kórsetkeni úshin 512 azamatymyz Keńes Odaǵynyń Batyry atandy. Sol ataqty eki retten ıelengender de bar. Qazaqstan halqynyń tyldaǵy erligi de eren. Jasy bar, qarty bar, erkegi bar, áıeli bar respýblıkamyzǵa kóshirilgen jáne osynda salynǵan 460 zaýytta kúni-túni tynymsyz eńbek etti. Uly Otan soǵysy kezinde atylǵan árbir on oqtyń toǵyzy bizdiń elde jasaldy. Odan bólek, kómir óndirdi, egin ekti, mal asyrady. kıim-keshek jasady... sol ónimderdiń barlyǵyn maıdanǵa attandyrdy. Osylaısha, fashıstik Germanııa men onyń odaqtastaryn tas-talqan etip, memleketimizdi jaýdan azat ettik. Osynyń barlyǵy keıngi urpaqtyń jadynda», – dep tebirene sóıledi.
Jıynda Reseıdiń Bas konsýldyǵy men Almatydaǵy Reseı yntymaqtastyǵy ókildiginiń ókilderi Stepan Sokolov pen Irına Pereverzeva, Almaty qalasy Medeý aýdandyq Ardagerler keńesiniń tóraǵasy Kım Serikbaev, Qazaqstannyń Jazýshylar Odaǵy tóraǵasynyń orynbasary Baqyt Bedelhan jáne Reıhstagqa tý tikken qazaqtyń batyr uly, Halyq Qaharmany Raqymjan Qoshqarbaevtyń qyzy Álııa Raqymjanova sóz sóılep, Uly Otan soǵysy kezindegi qazaqstandyqtardyń erligi jaıynda keńinen baıandady.
Saltanantty sharanyń sońy merekelik konsertke ulasty. QR Qarýly Kúshteri Ulttyq áskerı-patrıottyq ortalyǵy Almaty fılıalynyń áskerı orkestri, I.V.Panfılov atyndaǵy Qazaqstan-Reseı mamandandyrylǵan №54 mektep-lıseıi janyndaǵy «Juldyzdar» vokaldy ansambli, «Dıvertısment» skrıpkashylar ansambli, «Slavıan bazary» konkýrsynyń Gran-prı ıegeri Ádilhan Makın jáne taǵy basqa ónerpazdar óz ónerlerin ortaǵa saldy.
Sonymen qatar, osy shara aıasynda Qazaqstan Respýblıkasy Ulttyq kitaphanasynyń qory «Uly Jeńiske – 75 jyl» atty kitap kórmesin uıymdastyrdy.
