Atyraý oblysynyń burynǵy ákimi, qazir izdeýde júrgen qashqyn Bergeı Rysqalıevtiń qaryndasy Gúljanar Rysqalıevaǵa 2005 jyly aqtóbelik belgili bıznesmen Talǵat Qojahmetovti óltirýge tapsyrys berdi, degen aıyp taǵylyp otyr. Bul týraly «Ekspress-K» gazeti habarlady.
Kásipker Talǵat Qojahmetov ótken ǵasyrdyń 90-shy jyldarynyń sońynda Bergeı Rysqalıevpen birge Aqtóbede «Aıajan» degen araq óndirý fırmasyn ashqan kórinedi. Ol 2004 jyly óziniń áıeli Elenany óltirip, qashyp ketedi. Biraq qashyp uzaqqa bara almasyn bilgesin, quqyq qorǵaý organdary qolyna ózi kelip beriledi. Sońynan bolǵan sot ony qylmysty affekt jaǵdaıynda jasady degen jeńildikpen shartty jaza ǵana berip, qamaýda bosatyp jiberedi.
Al bıznesmenniń ózin óltirý 2005 jyly oryn alady. Polısııa osy oqıǵanyń artyn kóp sýytpaı, qylmysty jasaǵan Rahmetýlla Orynbaev degen azamatty da qolǵa túsiredi. Kezinde bul jigit Qojahmetovtiń qaramaǵynda kúzetshi bolyp jumys istegen eken. Onyń aıtýynsha, 1999 jyldyń qarashasynda bıznesmen muny urypty-mys. Osyǵan ókpelegen Orynbaev birden jumystan shyǵyp ketken sekildi. Biraq ishinde qan qatyp qalǵan ol kek qaıtarýdyń jolyn izdep júre beripti. Sonyń yńǵaıy 2005 jyldyń 22 maýsymy kúni kelgenge uqsaıdy. Osy kúni ol joldastarymen birge Qojahmetovtiń izine túsip ańdyp, oǵan óz úıiniń aýlasynda shabýyl jasaıdy. Munyń salǵan jaraqaty saldarynan Talǵat aýrýhanada kóz jumady. Al sot Orynbaevty 16 jylǵa bas bostandyǵynan aıyryp, qatań rejimdi kolonııada otyrý jazasyna kesedi.
2013 jyldyń basynda Joǵarǵy Sot Rahmetýlla Orynbaevqa qatysty úkimniń kúshin joıady. Osynyń sońyn ala Astanadan Aqtóbege quramynda Bas Prokýratýranyń, Ishki ister mınıstrliginiń jáne Ulttyq Qaýipsizdik komıtetiniń qyzmetkerleri bar kúsheıtilgen jedel top kelip, bıznesmenniń ólimine qatysty qylmystyq isti qaıta tekserýge kirisedi. Osy jumystardyń barysynda tergeý qyzmetkerlerinde jańa versııa paıda bolady. Oǵan sáıkes, kásipkerdi óltirý úshin Orynbaevty 15 myń dollar aqshaǵa jaldaǵan Gúljanar Rysqalıeva degen jańa boljam sýdyń betine qalqyp shyǵa keledi.
Ázirge R.Orynbaevtyń ózi kisi óltirýdi tapsyrys negizinde jasaǵanyn moıyndamaı otyrǵan syńaıly. Alaıda, iste onyń Qojahmetovke Rysqalıevanyń tapsyrmasy boıynsha shabýyl jasaý josparyn joldastarymen birge jasasqanyna kýálik etken adamnyń túsindirmesi tirkelip qoıypty.
Qylmystyq iste dál qazirgi kezde Gúljanar Rysqalıevanyń tergeýden qashyp, izdeýde júrgeni aıtylady. Oǵan qatysty ázirge syrttaı qylmystyq is qozǵalyp otyr.
Qurysh Nurymbet.
