Aımaqtar • 26 Aqpan, 2020

Aqtaýda «Adal kómek» aksııasy bastaldy

432 ret

kórsetildi

1 mın

oqý úshin

Halyq arasynda «ANTIKOR ORTALYǴY» qyzmetin keńinen nasıhattaý maqsatynda, sondaı-aq Memleket basshysynyń 2020 jyldy «Eriktiler jyly» dep jarııalaǵanyn eskere otyryp, qyzmet kórsetý ortalyqtarynyń bazasynda halyqtyń áleýmettik álsiz toptary úshin zańgerlik keńester berý maqsatynda respýblıkalyq «Adal kómek» aksııasy óz jumysyn bastady. Bul týraly Mańǵystaý oblysy sybaılas jemqorlyqqa qarsy departamentiniń baspasóz qyzmeti habarlady.

Gúlaıym DÁÝITBAI

Mańǵystaýda «ANTIKOR ORTALYǴY» 20 aqpanda ashylǵan bolatyn. Qoǵam ókilderine qyzmet etetin osy ortalyq araǵa eki kún salyp, óziniń tuńǵysh kelýshilerin qabyldady, ıaǵnı «Adal kómek» aksııasy osy alańda bastaý aldy. Eki kúnnen soń azamattardy jeke suraqtary boıynsha qabyldaý ótkizildi.

Eriktilerdiń qatarynda Mańǵystaý oblysynyń advokattar alqasynyń tóraǵasy Sáýlebaev Rashıd Serikbaıuly jáne advokat Ahmetova Álııa Baqytjanqyzy, Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń oqytýshysy Qoldasov Berik Serikuly jáne osy ýnıversıtettiń bir top stýdentteri boldy. Al «ANTIKOR ORTALYǴY» tarapynan Departament basshysynyń birinshi orynbasary Qanybekov Serik Mahanbetáliuly qatysty.

Mańǵystaý oblysy kólemine belgili asa tájirıbeli advokattardyń tálimdi áńgimesin, qyzyqty oqıǵalaryn, kásibı aqyl-keńesin tyńdaǵan bolashaq zańgerler ózderin qyzyqtyrǵan suraqtaryn ortaǵa salyp, tolymdy jaýaptar aldy.

Azamattyq qoǵam men jastar arasynda eriktilikti damytý úshin uıymdastyrylǵan «Adal kómek» aksııasy budan bylaı aptanyń ár senbisinde ótkizilip turatyn bolady.

Mańǵystaý oblysy