El namysyn Aleksandr Býblık, Mıhaıl Kýkýshkın, Andreı Golýbev, Aleksandr Nedovesov jáne Dmıtrıı Popko qorǵaıdy. Olarǵa Ýeslı Kýlhof, Jan-Jýlen Roıer, Robın Haase, Tallon Grıkspýr, Botık van de Zandshýlp qarsy turady. Sporttyq týrnırdiń baǵdarlamasyna sáıkes, 29 aqpan saǵat 14:00-de «Mega Silk Way» saýda ortalyǵynda jankúıerlermen kezdesý ótedi. Shara barysynda balalarǵa arnalǵan sheberlik sabaǵy uıymdastyrylady. 3 naýryz saǵat 12:30-da Nıderlandy quramasynyń, al saǵat 13:15-te Qazaqstan quramasynyń qatysýymen baspasóz konferensııasy ótedi. Jerebe 5 naýryzda josparlanǵan.
6 naýryzda týrnırdiń saltanatty ashylý rásiminen keıin 14:00-de match bastalady.
7 naýryzda qos komandanyń kezdesýi saǵat 12:00-de jalǵasady. Devıs Kýbogy júz jyldan astam tarıhy bar erler tennısindegi iri halyqaralyq komandalyq jarys bolyp tabylady. Ol 1900 jyldan bastap jyl saıyn ótkizilip keledi. Kýboktyń aǵymdaǵy ıegeri - Ispanııa qurama komandasy.
Aıta ketsek, Qazaqstan erler quramasy osy bedeldi týrnırdiń shırek fınalyna birneshe ret shyqty. Byltyr Portýgalııa komandasyn jeńgennen keıin, qurama 18-24 qarashada jańa formatta Madrıdte ótken Devıs Kýbogynyń fınaldyq kezeńine ótti. Ispanııa astanasynda Qazaqstan quramasy birinshi oıyn kúni Nıderlandy komandasyn 2:1 esebimen jeńdi, biraq Ulybrıtanııadan 1:2 esebimen utylyp, pleı-offqa shyǵa almady. О́tkizilgeli jatqan irikteý oıyndary qazaqstandyq tennısshiler álemniń úzdik komandalarynyń qatarynda bolýǵa laıyqty ekenin dáleldeýge múmkindik beredi.
