Fýtboldan Qazaqstan quramasy burnaǵy kúni túnde elordadaǵy «Astana-Arena» sport kesheninde Grýzııa komandasymen joldastyq kezdesý ótkizip, 1:0 esebimen utty.
Fýtboldan Qazaqstan quramasy burnaǵy kúni túnde elordadaǵy «Astana-Arena» sport kesheninde Grýzııa komandasymen joldastyq kezdesý ótkizip, 1:0 esebimen utty.
Jasyratyny joq, buǵan deıingi birneshe oıyndy sátsiz aıaqtaǵan Qazaqstan quramasy oıynshylarynyń bul joly tabysty oınaı qoıatynyna jankúıerlerdiń kópshiligi onshalyqty sene qoıǵan joq. Matchta komanda taǵy jeńiliske ushyrasa, ózine degen senimniń selkeýi birjolata setinep ketetinin bas jattyqtyrýshy Mıroslav Beranek te jaqsy bildi. Sondyqtan, ol kezdesýde qalaıda betburys jasaýǵa baryn saldy.
Al matchtyń bastapqy jaǵy qazaqstandyqtar úshin jaqsy nátıje kútip jatýdyń áýreshilik bolatynyn alǵa tartqandaı kórindi. Kezinde «keńestik brazılııalyqtar» degen at alǵan grýzınder ózderiniń oınaý tehnıkasyn jaqsy meńgergenderin tanytyp, kópke deıin dopty bizdiń jigitterge ustata qoımady. Sol senimdiliktiń súrleýinde olar birneshe ret qaqpaǵa dop baǵyttap úlgerdi. Sonyń ishinde Aleksandr Kobahıdze urǵan dop qaqpashy Andreı Sıdelnıkovti bir silkindirip ótti.
Bizdiń jerlesterimiz qarsy jaqqa birinshi shabýyldy tek 15-mınýtqa qaraı ǵana jasaı aldy. Aıyp alańynyń ishine ekpindeı kirgen Sergeı Hıjnıchenko urǵan dop golkıper Nýkrı Revıshvılıdiń qolynan tabyldy. Alaıda, osynyń artynsha qaıta jasalǵan shabýyl tusynda Sergeı múlt ketpedi. Aıyp alańynda dop qabyldap alǵan qaraǵandylyq jigit kenet kilt buryldy da, qaqpaǵa qaraı shirene tartty. Gol!
Myna sátsizdikten keıin meımandar taǵy yshqyndy. Olardyń jappaı alǵa umtylǵan joıqyn joryǵy barysynda Kobahıdze bir ret basymen qaqpaǵa dop baǵyttady. Al Jano Ananıdzeniń alystan atqylaǵan doby nysanadan qıys ketti. Sonyń artynsha buryshtama berilip, odan ushqan dopty Zýrab Hızanıshvılı qaqpaǵa dóp túsirýge umtyldy. Biraq bul da Andreı turǵan sheńberdiń ústinen zý ete tústi.
Osylaısha, kezdesýdiń ón boıy alma-kezek shabýylmen ótip jatty. Bul oıynda qonaqtardyń dopqa kóbirek ıelik etkenderin de, qaqpaǵa artyǵyraq urǵandaryn da, standartty jaǵdaıǵa molyraq tap bolǵandaryn da aıta ketýimiz kerek. Osyndaı tartysty kezdesýdiń 1:0 esebimen bizdiń qurama paıdasyna sheshilgeniniń ózi dátke qýat.
Endigi bir aıta ketetin jaıt, buǵan deıin sóz etip otyrǵan komandalar 2 ret kezdesken edi. 2005 jylǵy 17 tamyzda Almatyda ótken birinshi oıynda qonaqtar 2:1 esebimen jeńiske jetti. Al 8 qazanda Tbılısıde ótken qarymta oıyn 0:0 esebimen teń aıaqtaldy. Munyń ekeýi de álem chempıonatyna irikteý týrnıri sheńberinde ótti. Sonymen, úshinshi oıynda birinshi ret jeńiske jetken qazaqstandyqtar bul qarsylasymen aradaǵy utys sanyn da, dop aıyrmashylyǵyn da teńestirip otyr.
Rýslan IGILIK.
