«Qasıetti jol» qoǵamdyq qaıyrymdylyq qory 2011 jyldan bastap sal aýrýyna shaldyqqan balalarǵa ońaltý qyzmetin kórsetip keledi. Alǵashynda qor balalar úıindegi erekshe qajettilikteri bar jasóspirimderdi shetelge emge jiberip otyrǵan. 2014 jyldan bastap ońaltý ortalyqtaryn ashyp, búginge deıin 4974 balaǵa tegin ońaltý qyzmetin usynǵan. Elordadaǵy №2 qalalyq balalar aýrýhanasynda ornalasqan «Qasıetti jol» ońaltý ortalyǵynda 50 bala em alýda.
«Qasıetti jol» ońaltý ortalyǵynyń dırektory Aınur Nurqojaevanyń aıtýynsha, elimizde 3 aıdan 15 jas aralyǵynda sal aýrýyna shaldyqqan 26 myńnan astam bala bar. Bul tek tirkelgenderi. «Respýblıka boıynsha úsh ońaltý ortalyǵy bar. 2 jastan 15 jasqa deıingi balalardy emdeıtin «Qasıetti jol» ońaltý ortalyǵy men 3 aıdan 2 jasqa deıingi balalardy qabyldaıtyn «Balapan» erte aralasý ortalyǵy astanada ornalasqan. Elimizde sal aýrýyna eń kóp shaldyqqan balalar ońtústik aımaqta tirkelgendikten, Shymkent qalasynda «Kzhol Shymkent» ońaltý ortalyǵy jumys isteıdi. Onda 3 aıdan 15 jasqa deıingi balalar em qabyldaıdy. Ońaltý ýaqyty 21 kúnge sozylady. Jylyna úsh ortalyqta 1560 bala ońaltýdan ótedi», deıdi ol.
«Samruk-Kazyna Trust» áleýmettik jobalardy damytý qory demeýshilik etetin qaıyrymdylyq qory budan bólek «Qazaqstan jaqsylyq jasaıdy» degen jobany júzege asyryp keledi. Onda árbir belsendi turǵyn 365 teńgeni qaıyrymdylyqqa jumsaý arqyly balalardy ońaltýǵa múmkindik beredi. «Biz negizinen az qamtylǵan otbasy, kóp balaly otbasy jáne otbasynda eki múgedek bala bolǵan jaǵdaıda qujattaryn qabyldaımyz. Budan bólek Balalar úıinen 10 shaqty bala keledi. Sal aýrýyna shaldyqqan balalar da qoǵamnyń bir múshesi, biz isteı alatyn nárseler olardyń da qolynan keledi. Sondyqtan olardy kemsitpeýimiz kerek. Búgin bizdiń kishkentaı emdelýshilerimizdiń bireýi logoped, bireýi psıholog, bireýi defektolog, logoped bolyp qonaqtardy qabyldap jatyr», deıdi Aınur Nurqojaeva.
Is-shara sońynda ońaltý ortalyǵynda emdelip jatqan balalar ózderiniń ónerin kórsetti.
