Qarjylandyrý máselesi, memlekettik qoldaý sharalary, gaz teńgerimi jáne atalǵan jobany iske asyrýdan kútiletin nátıje týraly Ulttyq ekonomıka mınıstri R. Dálenov, Energetıka mınıstri N. Noǵaev jáne Atyraý oblysynyń ákimi M. Dosmuhambetov, memlekettik organdar men ulttyq kompanııalardyń basshylary baıandady.
Qashaǵan ken ornynda ilespe gaz óńdeý zaýytyn salý jobasyn 2021 jyldyń sońyna deıin Atyraý oblysynyń Maqat aýdanynda, «Bolashaq» munaı jáne gazdy keshendi daıyndaý qondyrǵysynan soltústik-shyǵysqa qaraı 12 shaqyrym jerde jáne Eskene temir jol stansııasynan ońtústikke qaraı 5 shaqyrym jerde iske asyrý kózdelgen. Jobalyq qýattylyǵy — jylyna 1 mlrd tekshe metr. Investor — «GPC Investment» JShS. Investısııa kólemi - $860 mln.
«Qashaǵan ken ornynda ilespe gazdy óńdeý zaýytyn salý elimiz úshin mańyzdy joba, ol ken ornynda munaı óndirýdi 12 mln tonnaǵa arttyrýǵa, sondaı-aq qurylys kezeńinde 2800 ýaqytsha jáne paıdalanýǵa berilgen soń 600 turaqty jumys ornyn qurýǵa múmkindik beredi», — dedi A. Mamın.
Úkimet basshysy zaýyt ónimi ishki jáne syrtqy naryqtarǵa shyǵarylatynyn atap ótti.
«О́tken jyldyń qazan aıynan bastap biz atalǵan jobany jan-jaqty zerdeledik. Búgingi otyrysty zaýytty salý týraly sheshim qabyldaıtyn qorytyndy jıyn retinde qarastyrý qajet», — dedi A. Mamın.
Atyraý oblysyna jumys sapary aıasynda Premer-Mınıstr sonymen qatar munaı-gaz salasy úshin jabdyqtar men quraýyshtardy óndiretin kásiporyndar — «Kaspıı Plıýs», «International Pipeline Structure Solutions Caspian», «Caspian Contractors Trust Atyrau» JShS-yn aralady.
