Abaı • 27 Aqpan, 2020

Almatyda Abaı murasyn asqaqtatqan kesh ótti

592 retkórsetildi

Ult rýhanııatynyń altyn besigine balanatyn Almaty tórinde Abaı ánderi áýelegen ásem kesh ótti. Respýblıka saraıynda  shymyldyǵyn túrgen mazmundy sharada poezııa men mýzyka saltanat quryp,  oıshyldyń ilimi jańa sıpatta kórinis tapty. Aıtýly keshke Almaty qalasynyń ákimi Baqytjan Saǵyntaev bastaǵan  zııaly qaýym ókilderi qatysty.

«Ushar basy kóz jetpes, kir shalmas zańǵar Abaı! Oılap otyrsaq, biz qaı kezde de Abaıdy izdeppiz. Janyń jadyrap qýanǵanda esińe Abaı túsedi. Kóńilińiz dostan da, dushpannan da, tipti mynaý ǵajap ómirden de qalyp qulazyǵanda taǵy da  Abaı aldyna baramyz. Kúıip-janyp ǵashyq bolsaq, aıtarǵa sóz tappasaq sol sezim Abaıdan tabylady. Eljirep, kókiregimizdi meıir kernese onyń da sáýlesi Abaıdan jetken eken. El dep, Otan dep oılansaq ta Abaıdan alysqa kete almaımyz. Urpaǵymyzdy jaryqqa bastar jol izdesek te Abaıǵa qaraılaımyz». Dál osyndaı mátinmen  máıektelgen áserli qoıylym keshke jınalǵandardy hakim áleminiń tereńine úńilýge shaqyrdy.

Sahna tórinde Abaı jazǵan qazaq ádebıetiniń alǵashqy balladasynyń áýenine balet, horeografııalyq mınıatıýra qoıyldy. Hronologııa boıynsha ázirlengen epızodtar poezııa, mýzyka jáne horeografııamen úılesimdi úndesip, baı muranyń syryn ashty. Abaıdyń qalyptasýy, damý kezeńderi kórsetilip, oqıǵalar jelisi Abaı peızajdarynyń sýretteri arqyly  órilip otyrdy.

«Álem esigi» prologynan bastaý alǵan is-shara jyl mezgilderine arnalǵan óleńdermen kómkerilip, balalardyń bıi kúıdiń súıemeldeýimen oryndaldy.

Sondaı-aq sahnada aqyndyq-mýzykalyq, horeografııalyq qoıylymdar, sonyń ishinde Abaıdyń mahabbat lırıkasy, tabıǵat sulýlyǵyna arnalǵan qoıylymdary qoıyldy. Buǵan deıin tek dombyrada oryndalyp kelgen «Segiz aıaq» ánin estrada-sımfonııalyq orkestriniń súıemeldeýimen Nurjan Janpeıisov, Erlan Rysqalı, Tilek Bazarov syndy tanymal ánshiler kópshilikke tamyljyta jetkizdi.

Kesh sońynda zalǵa jıylǵan qaýym Abaıdyń «Kózimniń qarasy» ánin óner maıtalmandarymen qosyla shyrqady. Kishkentaı kórermender hakim murasynyń bıik baǵasyn kórsetip, uly aqynnyń otty jyrlaryn alma-kezek jatqa oqydy. Abaı Qunanbaıulynyń 175 jyldyq mereıtoıyna arnalǵan sharany Almaty qalasynyń ákimdigi uıymdastyrdy.

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar