Múmkindigi shekteýliler árdaıym qoldaý kóredi

Paralımpıadalyq jattyǵý ortaly­ǵynda Qazaqstan qurama komandasynyń oqý-jattyǵý jıyndary, sheteldik komandalarmen birlesken jıyndar sonymen qatar, túrli sporttyq básekeler ótedi.

Qazaqstan Respýblıkasynyń Paralım­pıa­dalyq qurama komandasynyń quramyna barlyǵy sporttyń 13 túrinen 523 sportshy kiredi. Esterińizge salaıyq, 2019 jyldyń mamy­rynda ortalyqty aralaý barysynda Prezıdent Qasym-Jomart Toqaev Tokıoda ótetin Paralımpıada oıyndarynda ta­bys­ty óner kórsetýi úshin Qazaqstan qura­ma­syna barlyq uıymdastyrý jáne qar­jy­lyq qoldaý kórsetiletinin aıtqan bola­tyn.

Paralımpıadalyq jattyǵý ortalyǵy 2018 jyldyń 4 shildesinde Tuńǵysh Prezı­dent Nursultan Nazarbaevtyń qatysýymen ashyldy.

Qazaqstanda ázirge balamasy joq ortalyq jazǵy jáne qysqy paralımpıadalyq sport túrleri boıynsha ulttyq qurama komandalar men sporttyq rezervtiń sapaly ári kásibı jattyǵýyna arnalyp salynǵan. Múmkindigi shekteýli jandarǵa arnalǵan mundaı ortalyq AQSh, Ulybrıtanııa, Japonııa jáne Ońtústik Koreıada ǵana bar.

Ortalyq barlyq qajetti qural-jab­dyqtarmen jaraqtalǵan.

E.Toǵjanovqa ortalyqty tanystyrǵan Ulttyq Paralımpıadalyq komıtettiń tór­­aǵasy Qaırat Boranbaev elimizdegi par­alım­pıalyq qozǵalys qyzmeti men múmkin­digi shekteýli jandar arasyndaǵy buqa­ra­lyq sporttyń damýy týraly áńgime­lep berdi. Onyń aıtýynsha, ortalyq qurylysy men jabdyqtaý barysynda múmkindigi shek­teýli jandardyń barlyq qajettilikteri eskerilgen.

Paralımpıadalyq jattyǵý ortaly­ǵynda múgedek sportshylar sporttyń 14 túri boıynsha jattyǵa alady. Aı saıyn mun­da shamamen múmkindigi shekteýli 6 myńǵa jýyq sportshy jattyǵady.

Ortalyqta beıimdelgen ámbebap sıfr­ly trenajerlar men toptyq jattyǵý­larǵa yńǵaıly aımaqtan turatyn jatty­ǵý, oıyn jáne kúreske arnalǵan úsh sport­tyq zal jumys istep tur. Bir atap óter­ligi, ortalyqty jabdyqtaýǵa paralım­pıa­dashylardyń ózderi de atsalysqan. Máselen, arbada otyryp bıleý boıynsha el quramasynyń múshesi Ardaq Otarbaev osyndaǵy múgedekter arbasyn jýatyn oryn­nyń avtory.

E.Toǵjanov Paralımpıadalyq jat­tyǵý ortalyǵynyń qazirgi zamanǵa saı ınfraqurylymy men materıaldyq-teh­nı­kalyq jabdyqtalýyna joǵary baǵa berdi.

Sapar barysynda Premer-Mınıstrdiń orynbasary otandyq paralımpıada sportynyń tarıhynda kórý qabileti tómen sportshylar arasynda tuńǵysh ret uıymdastyrylǵan golboldan Qazaqstan Kýbogynyń ashylý saltanatyna qatysty.

E.Toǵjanov sportshylarǵa arnaǵan sózinde elimizde paralımpıadalyq sportty damytýdyń mańyzyn atap ótti. «Múmkindigi shekteýli jandardy áleýmettik qorǵaý árdaıym el basshylyǵynyń ba­qylaýynda. Memleket qazir múmkindigi shekteýli jandardyń ózin damytýǵa jáne tolyqqandy ómir súrýi úshin barlyq qajetti jaǵdaıdy jasap otyr. Paralımpıadalyq jattyǵý ortalyǵynyń ashylýy osyǵan dálel. Sizderdiń árqaısyńyzda jeńiske degen ynta-jiger jetkilikti. Biraq jeńis tuǵyrynyń joǵary bıigin baǵyndyrý úshin búginnen bastap ter tógý qajet. Sizderge el úshin jaýapty syndarda joǵary jetistikter tileımin!», dedi E.Toǵjanov.

Eki kúnge sozylatyn baıraqty básekege elimizdiń 5 óńirinen 40-tan asa golbolshy qatysyp jatyr. Golbol Paralımpıada oıyndarynyń baǵdarlamasyna engizilgen. Sporttyń bul túri Qazaqstanǵa 2017 jy­ly kelgen. Sodan beri 3 chempıonat uıym­das­tyryldy.

Bıylǵy báseke komandaǵa halyqaralyq arenaǵa shyǵýǵa jol ashady.