Abaı • 28 Aqpan, 2020

Qyzylorda: «Abaı jolymen» respýblıkalyq aqyndar aıtysy ótti

211 retkórsetildi

Qyzylordada Abaı Qunanbaıulynyń 175 jyldyǵyna oraı «Abaı jolymen» atty respýblıkalyq aqyndar aıtysy uıymdastyryldy.

Sóz dodasynyń ashylýyna osy óńirde saparmen júrgen Nur Otan partııasy Tóraǵasynyń birinshi orynbasary Baýyrjan Baıbek pen oblys ákimi Qýanyshbek Ysqaqov qatysty. Baýyrjan Qydyrǵalıuly jetekshi partııanyń tól ónerimizge jasap jatqan qoldaýy jaıly tarata aıtyp, elimizdiń ár túkpirinen jınalǵan aıtyskerlerge sáttilik tiledi. Oblys basshysy Qýanyshbek Dosmaıyluly hakim Abaıdy ulyqtaý sharalary alda da jalǵasatynyn jetkizdi.

Qazaqstannyń eńbek sińirgen qaıratkeri Júrsin Erman júrgizgen sóz dodasyna Serik Qusanbaev (Shyǵys Qazaqstan oblysy), Aıbek Qalıev (Arqalyq qalasy), Aspanbek Shuǵataev (Pavlodar qalasy), Ásem Erejeqyzy (Nur-Sultan qalasy), Arýna Kerimbek (Aqtóbe oblysy), Jansaıa Mýsına (Batys Qazaqstan oblysy) Aıan Nııazbek (Shymkent qalasy), Sulýjan  Taýboldy (Almaty qalasy), Kenjebaı Júsipov, Muhtar Nııazov, Meıirbek Sultanhan, Beksultan Orynbasarov (Qyzylorda oblysy) qatysty. Qazaqstannyń halyq aqyny Ásııa Berkenova bastaǵan qazylar alqasynyń quramynda belgili jyraý Almas Almatov pen aqyndar Ǵalym Jaılybaı, Janarbek Áshimjan boldy.

Kórermender tartqan jerebe arqyly sahnaǵa shyǵatyn juptar anyqtalǵan aıtysty alǵashqy bolyp shymkenttik Aıan Nııazbek pen jergilikti aqyn Kenjebaı Júsipov bastady. Á degennen aryndaǵan Aıandy saqa Kenjebaı tez-aq sabasyna túsirdi. Odan keıingi Muhtar Nııazov pen Aıbek Qalıev, Meıirbek Sultanhan – Arýna Kerimbek, Serik Qusanbaev – Sulýjan Taýboldy, Jansaıa Mýsına – Beksultan Orynbasarov, Aspanbek Shuǵataev – Ásem Erejeqyzy aıtystarynda da kórermenniń kóńiline qona qalar oramdy oı, kesteli sóz aıtyldy.

Qazylar alqasynyń sheshimimen bes saǵatqa sozylǵan aıtystyń bas júldesi Muhtar Nııazovqa buıyrdy. Al I oryndy Jansaıa Mýsına ıelense, II oryndy Ásem Erejeqyzy, III oryndy Meıirbek Sultanhan men Aıbek Qalıev enshiledi.

Sońǵy jańalyqtar

Uqsas jańalyqtar