Aımaqtar • 28 Aqpan, 2020

Aýyr synaq, qıyn suraq

31 retkórsetildi

Sársenbi kúni Petropavl qalasynda aýa raıy erekshe minez kórsetip, burshaq aralas jańbyr jaýdy. Onyń ústine qatty jel turyp, kókmuzdaqqa aınalǵan qala kóshelerinde jaıaý júrginshilerdi ushyryp jiberý qaýpi týdy.

Osynyń kesirinen Petropavl aýrýhanalarynyń jaraqat bólimderine 39 adam júgingen. Bir qyzyǵy, Nur-Sultan qalasynda mundaıda aldyn ala eskertý jasaıtyn 112 qyzmeti Petropavlda shabandyq kórsetip, tek ekinshi kúni ǵana mektep oqýshylaryna sabaq bolmaıtyndyǵyn jarııalady.

Jalpy, bıyl Soltústik Qazaqstanda qalyptaǵy qys bolǵan joq. Qańtar aıynyń qaqaýǵa tıisti kúnderi de qulaq tońǵyzbaıtyn birsydyrǵy ǵana salqyn boldy. Al aqpan aıy qalyptaǵy naýryz aıyna uqsap, jylymyq bolyp, arasynda qar da erip, ol keshke jáne túnde qatyp, kók muzǵa aınalyp  jatty. Munyń qandaı sebebi bar ekenin eshkim bilmeıdi. Qaladaǵy tosyn apatqa ushyraǵan adamdar aldymen aparylatyn №3 aýrýhananyń jaraqat bóliminiń meńgerýshisi V.Grıbashevtiń aıtýyna qaraǵanda, barlyǵy 94 adam emdelýde eken. Solardyń negizgi bóligi kóktaıǵaqtyń kesirinen túskender. 

Osy kúnderi respýblıkalyq qana emes, oblystyq mańyzy bar avtojoldar da tegis jabyldy. Alaıda buryn jolǵa shyǵyp ketken respýblıkalyq joldardaǵy jolaýshylar qıynshylyqtardy bastarynan keshýde ekenin Jol polısııasynyń aǵa ınspektory B.Baıǵaskına habarlady. Onyń aıtýyna qaraǵanda, Maǵjan Jumabaev aýdanynyń aýmaǵy arqyly ótetin «Chelıabi-Novosibir» avtojolynda 60-tan astam kólik júre almaı, keptelip qalǵan.

«Bizdiń patrýldik polısııa qyzmetkerleri atalǵan avtokólikterdiń ótýine múmkindikter týdyrýda. Oǵan qajetti barlyq jumystar jasalýda. Ázirge oblys aýmaǵynda jol kólik oqıǵalary tirkelgen joq» dedi ol BAQ-qa arnaǵan sózinde.

Dál osy kúni oblystyq ákimdiktiń otyrysy bolyp, onda negizgi másele retinde bıylǵy kóktemdegi qarǵyn sýynan qalaı saqtaný máseleleri talqylandy. Bıylǵy qalyń jaýǵan qardyń kesirinen oblys boıynsha 92 eldi meken men Petropavldyń shetki aýmaqtaǵy 250-ge jýyq  úıin sý basýy múmkin. Kazgıdromet mamandarynyń aıtýynsha, búginge deıin jaýǵan qardyń qalyńdyǵy keı jerlerde  48 sm-ge deıin jetedi. Sonyń saldarynan qar sýynyń mólsheri normadan eki ese joǵary bolmaq. О́tken jyldardyń tájirıbesin eskere otyryp, sý basý qaýpi joǵary eldi mekenderdiń 60-ynyń mańynda topyraqtan bóget jasalyp jatyr. «Qazgıdromet» RMM SQOF dırektory Qymbat Merǵalıevanyń aıtýyna qaraǵanda: «Qazir oblystyń ózen-kólderinde sý molynan jınalǵan. Sergeev sý qoımasy 95 prosentke toly, bul 2017 jyldyń kórsetkishke sáıkes keledi. Bıylǵy qys erekshe jyly bolǵandyqtan, kóktem erte kelip, muz tez erıdi. Naýryzdaǵy ortasha aýa temperatýrasy -6 gradýsty quraıdy. Bul normadan 1 gradýsqa joǵary». 

Al oblystyq Tótenshe jaǵdaılar departamentiniń bastyǵy Ramıl Kamalovtyń aıtýyna qaraǵanda: «Bıyl Sleti ózeniniń boıyndaǵy Ýálıhanov aýdanynyń  Qýlykól men Qaratal aýyldaryn sý basý qateri mol. О́ıtkeni, bul ózenge jınalatyn erigen sýdyń mólsheri normadan 1,5 ese kóp. Osyǵan baılanysty aýdan ákimdigi aldyn ala tehnıkanyń daıyndyǵyn tekserip, qajet jaǵdaıda kórshi oblystyń kómegine júginýge daıyndalýy qajet». 

Oblys ákimi Qumar Aqsaqalov ta bul máselege qatty alańdaıtynyn bildirdi. Ol óziniń sózinde: «Bıylǵy kóktem qıyn bolmaq. 2017 jylǵy jaǵdaı qaıtalanbas úshin jumyla shara qoldanýymyz qajet. Aýyr tehnıkany daıyndańyzdar. Bizdiń tehnıkamyz jetpese, kórshi óńirlerden surańyzdar», - dedi.

Qalaı desek te, bıylǵy kóktem oblys pen aýdan basshylarynyń iskerligine úlken synaq bolǵaly tur. Tek isker basshylar ǵana qıyndyqty eńsere alatyndyǵy daýsyz.

 

Soltústik Qazaqstan oblysy   

Sońǵy jańalyqtar

Shymkent: Sıfrly otbasynyń bir kúni

Ońtústik Qazaqstan • Keshe

Uqsas jańalyqtar