Kibise jylynyń paıda bolýy ejelgi Mysyrdan bastaý alǵan. Osy eldiń ǵalymy Sotıs sonaý jyldardyń ózinde «Súmbile» eń jaryq juldyzyn biraz ýaqyt zerttegen. Onyń tańerteńgilik ońtústik kókjıekten kórinýinen bastap, ár jyldyń 365 kúnnen turatynyn anyqtaǵan. Al Sotıstiń Súmbile juldyzyn zertteýi kóktem kezinde aǵyl-tegil tasıtyn Nil ózeni sýynyń sharýalardyń úlken eńbekpen ekken egistik alqaptaryn shaıyp ketýine baılanysty boldy. Osylaısha, juldyzdardyń jaı-kúıin tereń zerttegen egıpettik ǵalymdar kúnderdi jańylmaı sanaı otyryp, halyqqa Súmbileniń týatyn mezgilin der kezinde eskertip júrdi.
Osyndaı sanaqtyń nátıjesinde ózimiz búgingi kúni qoldanylyp júrgen kúntizbe paıda boldy. Sóıtip, ǵalymdar kún men túnniń teńelý ýaqytynyń arasyn jyl dep atady. Jyldyń tórt mezgilin ańǵaryp, bir jyldy jyldyń mezgilderine sáıkes tórtke bóldi. Buǵan qosa, ǵalymdar ózderiniń zertteýinde ár úsh jyldyń 365 kúnge aıaqtalyp, al árbir tórtinshi jyldyń kún sany aldaǵy úsh jylda bir kúnniń artyq qalýy saldarynan 366 kúnge tolatynyn dálme-dál eseptep shyǵardy. Mine, osydan kelip, slavıandar «vısokosnyı», al musylman elderi «Kibise jyl» dep ataıtyn jyl paıda boldy. Al tórt jylda bir ret qaıtalanyp keletin basy artyq bir kún aqpan aıynyń úlesine tıdi. Osylaı Kibise jyly paıda boldy.
