Prezıdent • 01 Naýryz, 2020

Prezıdent Qasym-Jomart Toqaev Qordaı aýdanynda boldy

195 retkórsetildi

Búgin Memleket basshysy Qasym-Jomart Toqaev Jambyl oblysynyń Qordaı aýdanynda bolyp, Qarakemer aýylynyń turǵyndarymen kezdesti. Prezıdent kezdesýde 1 naýryz – Alǵys aıtý kúni Qordaı aýdanyna jumys saparymen arnaıy kelgenin aıtty.  

– Qordaıda bolǵan oqıǵa halqymyzdy dúr silkindirdi, búkil álemdi eleń etkizdi. Shyny kerek, bul janjal memleketimizge, elimizge nuqsan keltirdi. Abyroıymyzǵa zııany tıdi. Endi tutas ult bolyp osyndaı teris tájirıbeden sabaq alýymyz kerek. Eń aldymen, keleshekte mundaı qasiretti boldyrmaý úshin tıisti shara qoldanýymyz qajet, – dep atap ótti Prezıdent.

Memleket basshysy Qasym-Jomart Toqaev qordaılyqtarǵa Elbasy Nursultan Nazarbaevtyń saıasatynyń arqasynda Qazaqstannyń álem jurtshylyǵyna bedeldi,  abyroıly, qarqyndy damyp kele jatqan el retinde tanylǵanyn aıta kele, endigi mindet osy jetistikterdi saqtap qalý, ony barynsha arttyrý ekenin atap ótti. Sonymen qatar, Prezıdent Jambyl oblysynyń jańa basshylyǵynyń aldyna aımaqtyń ósip-órkendeýin tejeıtin kedergilerdi joıyp, halyqtyń ál-aýqatyn arttyratyn sharalar qabyldaý mindetin qoıdy.

– Qaqtyǵys bolǵan jerde eshqashan, eshqandaı damý bolmaıdy. Bul – zańdylyq. О́kinishke qaraı, oblys basshylary bul zańdylyqty durys túsingen joq. Sondyqtan oblys basshylary, sonyń ishinde quqyq qorǵaý organdarynyń basshylary tolyǵymen aýystyryldy, qyzmetkerler jumystan bosatyldy. Jańa basshylar taǵaıyndaldy. Solardyń arasynda Berdibek Saparbaev bar. Bul azamatty jaqsy tanısyzdar. Tájirıbesi mol memlekettik qyzmetshi. Onyń aldynda turǵan maqsat – turaqsyzdyqqa túrtki bolatyn jaǵdaılardy túbegeıli joıý jáne óńirdiń damýyna serpin berý, – dedi Qasym-Jomart Toqaev.  

Turǵyndarmen kezdesý barysynda Prezıdent Táýelsizdiktiń arqasynda qazaq halqy shyn mánindegi memleket qurýshy ultqa aınalǵanyn atap ótti. Sondaı-aq, memleketimizdiń bolashaǵy úshinerekshe jaýapkershilik arqalaǵan aýyl aqsaqaldary osy baǵytta jumys júrgizip, eldegi bereke-birlikti nyǵaıtyp, jastarymyzǵa durys jol kórsetip, tárbıe berýi kerektigi de aıtyldy.

– Tól halqymyzdyń shynaıy qasıetteri, bolmysy qandaı bolýy kerek? Bul, eń aldymen, keńshilik, jomarttyq, jaısańdyq, jasampazdyq degen sóz. Biz basqa ulttarǵa, ózge elderge ónege, úlgi kórsetýimiz kerek. Qazaq halqy beıqam, jalqaý, erinshek, onyń qolynan eshqandaı jumys kelmeıdi degen jaǵymsyz áńgimelerdi doǵarý qajet. Biraq osyndaı teris pikirlerdi toqtatý úshin ózimizdińeńbekqorlyǵymyzdy kórsetýimiz kerek, – dep Memleket basshysy aqsaqaldardy urpaq tárbıesinde belsendilik tanytýǵa shaqyrdy. Sondaı-aq, Prezıdent tergeý jumystary zańǵa sáıkes júrgiziletinin, zań aldynda bári teń ekenin aıtyp, Qordaıdaǵy jergilikti qyzmetkerlerdiń para alý jáne shekara arqyly zańsyz saýda jasaý máselelerin sheshýdi tapsyrdy.

 – Aýdanda bir top adam belsendi túrde kontrabandamen aınalysyp júrgen. Bul – belgili nárse. Osy iske basqa top ta qatysqysy kelgen. Bir sózben aıtsaq, zańsyz tabys kózi úshin eki qylmystyq toptyń arasynda teketires paıda bolǵan. Bul teketires saldarynan kóp adam zardap shekti. 11 adam qaza tapty. Ony ashyq aıtý kerek. Endi quqyq qorǵaý organdarynyń aldynda turǵan maqsat – barlyq qylmyskerlerdi ultyna qaramaı, zańǵa sáıkes jazaǵa tartý. Onsyz elimizde tártip bolmaıdy, – dedi Prezıdent.

Sondaı-aq, kezdesýde Qordaı aýdandyq ardagerler keńesiniń tóraǵasy Ábdibek Seıilhanov, Jambyl oblysynyń Qurmetti azamaty Tóle Súgirbaı sóz sóılep, aýdandaǵy áleýmettik jáne basqa da máselelerdi sheshý jóninde óz oılaryn ortaǵa saldy.

 – Ultaralyq tatýlyq – bizdiń eń basty qundylyǵymyz. Sondyqtan oǵan syzat túsirmeýimiz kerek, – dep Qasym-Jomart Toqaev jıyndy qorytyndylady.

Budan keıin Memleket basshysy Qarakemer aýylynyń sport keshenine baryp, jas sportshylardyń jattyǵý barysyn kórdi. Bolashaq sportshylarǵa tabys tilep, olarǵa qajetti doptar men boks qolǵaptaryn syıǵa tartty.

Qazaqstan Respýblıkasynyń Prezıdenti Qasym-Jomart Toqaev Qordaı aýdanyna jumys saparynda aýdandaǵy dúngen dıasporalarynyń ókilderimen de kezdesti. Kezdesýde Memleket basshysy Qazaqstandy dostyqtyń, beıbitshilik pen kelisimniń, sondaı-aq, barlyq etnıkalyq toptardyń ortaq otany bolyp sanalatynyn atap ótti. Elimiz túrli tarıhı jaǵdaılarǵa baılanysty, qıyn-qystaý zamanda májbúrli túrde qazaq jerin panalap kelgen halyqtyń bárin qushaq jaıa qarsy alǵanyn aıtty. Memleket basshysy Qordaı aýdanynda bolǵan oqıǵadan durys qorytyndy shyǵarý kerek ekenin málimdedi.

 – Bolǵan qaıǵyly oqıǵa artta qalýy tıis. Aldaǵy ýaqytta tatý-tátti, túsinistikte birge ómir súremiz. Biz budan sabaq alýymyz kerek. Buryn-sońdy mundaı jaǵdaı bolǵan emes. Bul bıliktiń de jibergen kemshiligi. Sondyqtan men birden oblys basshylyǵyn, sonyń ishinde quqyq qorǵaý organdarynyń jetekshilerin de aýystyrdym, – dedi Memleket basshysy.

Qasym-Jomart Toqaev Berdibek Saparbaev tóraǵalyq etetin Úkimettik komıssııa barlyq nysandardy qaıta qalpyna keltirip, áleýmettik máselelerdi sheshýmen aınalysatynyn aıtty. Sonymen qatar, aımaqtaǵy ahýal jiti baqylaýda bolatynyn jetkizdi.

Prezıdent dúngen dıasporasynyń ókilderimen kezdesip, olarǵa jastardyń tárbıesine basa mán berip, olardy árbir halyqtyń mádenıetine, qazaq tili men Qazaqstannyń memlekettik rámizderine qurmetpen qaraýǵa shaqyrdy.

– Sizderdiń balalaryńyz qazaq tilin úırenýi kerek. Sondaı-aq orys tili men óziniń ana tilin de bilýi qajet. Memleket sizderdiń mádenıetterińiz ben dástúrlerińizdi saqtap, damytýǵa jan-jaqty qoldaý kórsetedi. Degenmen sizder, ásirese, aýylda turatyn azamattar memlekettik tildi bilgenderińiz asa mańyzdy, – dedi Memleket basshysy.

Sonymen qatar Prezıdent jastardyń Qordaı aýdanyndaǵy birneshe aýylda ǵana emes, Qazaqstannyń barlyq óńirinde jumys isteýine mol múmkindik bar ekenin jetkizdi.

 – Qazaqstan – baıtaq ári baı memleket. Elimizdiń soltústiginde qunarly jerler bar. Biz nege bir jerde ǵana turaqtaýymyz kerek? Balalaryńyzdy soltústikke, shyǵysqa qaraı jiberińizder. Soltústik, batys, ońtústik, shyǵysta sizderdiń balalaryńyzǵa jumys istep, aqsha tabýǵa múmkindik mol, – dedi Qasym-Jomart Toqaev.

Kezdesýde Memleket basshysy jurtshylyqty qaıǵyly oqıǵanyń qaıtalanýyna jol bermeýge shaqyrdy. О́ńirdegi quqyq qorǵaý organdarynyń jańa basshylyǵyna qoǵamdyq tártip pen turǵyndardyń qaýipsizdigin qamtamasyz etý, sondaı-aq, qylmystyń aldyn alý jóninde mindet júktedi.  

Kezdesýde Qordaı aýdanynyń Qurmetti azamaty Shısyr Dınlason kezinde qamqorlyq kórsetken qazaq halqyna qonaqjaılylyǵy men meıirimi úshin alǵys bildirdi. Eńbek ardageri jergilikti dúngenderdiń bolǵan oqıǵaǵa ókinish bildirip, keshirim suraıtynyn aıtty. Sortóbe aýyldyq mektebiniń qazaq tili men ádebıeti pániniń muǵalimi Edık Sýlarov jergilikti balalarǵa memlekettik tildi, Qazaqstan tarıhyn, qazaq halqynyń salt-dástúrin oqytýǵa nıetti ekenin jetkizdi.

Kezdesý sońynda Qazaqstan Prezıdenti Qasym-Jomart Toqaev Qarakemer, Masanshy jáne Sortóbe aýyldaryndaǵy qoǵamdyq tártipti qamtamasyz etetin Arnaıy jedel áreket etý jasaǵynyń jaýyngerlerimen, Ulttyq gvardııanyń áskerı qyzmetshilerimen áńgimelesti.

 

Jambyl oblysy

Sońǵy jańalyqtar

Taraz qalasy karantınge jabylady

Aımaqtar • Búgin, 21:48

Asqar Altaı. VIRÝS-MÝTANT (Novella)

Ádebıet • Búgin, 19:07

Tankerlerdiń qaıda baratyny belgisiz

Ekonomıka • Búgin, 18:32

Ár teńge úshin esep berýge daıynbyz

Ekonomıka • Búgin, 17:01

Esik nege «tesik»?

Qoǵam • Búgin, 15:25

Betperde kıgen kóktem - 5

Qoǵam • Búgin, 15:10

Qyzylorda oblysy: Taǵy 3 adam vırýs juqtyrdy

Koronavırýs • Búgin, 13:31

COVID-19 vırýsy mysyqtan tabyldy

Álem • Búgin, 12:03

Syrdarııaǵa jylanbalyq qaıdan kelgen?

Aımaqtar • Búgin, 11:32

Koronavırýs hám kóshe sýretteri

Álem • Búgin, 10:51

Uqsas jańalyqtar