Qarmaqshyda III Internasıonal atty aýyl bar. San ulttyń basyn qosqan eldi meken ejelden birlik arqyly jetken berekesimen tanymal. Osy aýylda týdym, er jettim, eńbek jolymdy mehanızator bolyp bastadym. Áskerden oralyp, kásibimdi qaıta jalǵastyrdym. 2005 jyldan bastap táýekel erdiń isi dep, «Aqnıet» sharýa qojalyǵyn ashtym.
Bul jerde aıtpaǵym, qazaqta «Jaqsylyq júrgen jerde tapshylyq bolmaıdy» degen jaqsy sóz bar ǵoı. Kezinde atalarymyz aryp-ashyp jetkende, olardyń qoltyǵynan demep, jarty dándi jaryp bergen qazaqtar bolmasa biz bul kúnge jetpes edik.
Shúkir, eńbek adamy retinde eleýsiz qalǵan kezim joq. Birneshe márte gramotalar aldym, «Aýyl sharýashylyǵy salasyndaǵy úzdik kásipker» nomınasııasynyń ıegeri atandym. Osy jetistik bıiginde turǵan sátte esime eń aldymen qazaqtardyń bizge jasaǵan jaqsylyǵy túsedi.
«Saýsaq birikpeı, ıne ilikpeıdi» degen bar. Biz talaı kezeńnen birligimizdiń arqasynda aman óttik. Qazaqstan erkindik alǵan jyldary «kóp etnosty memleket endi ishten irıdi» degen mysyqtileýli boljam jasaǵandar da bolmaı qalǵan joq. Biraq qazaq baýyrlarymyzdyń darhandyǵynyń arqasynda olardyń degeni bola qoıǵan joq, qaıta birligimiz bekı tústi.
Bizde basqa Otan joq. Úlken ulym Abdýlla jergilikti ýnıversıtetti bitirip, munaı salasynda jumys istep jatyr. Ekinshi ulym Iznýl da – joǵarǵy bilimdi maman. Qazir sharýa qojalyǵynda maǵan qolqabys etip júr. Qyzym Rabııa medısına salasyn tańdady. Ol da bolashaqta maman retinde osy óńirdiń, eldiń órkendeýine úles qospaq.
Qashqansýdyń tabanynan qut tapqan túrikterdiń qazaq baýyrlarmen muraty ortaq, múddesi bir.
Ashtar MÝRATOV,
«Aqnıet» ShQ tóraǵasy
Qyzylorda oblysy
