Aınur Ámirhannyń aıtýynsha, qazirgi tańda kásipkerlikpen aınalysýǵa, bilim alýǵa kóptegen múmkindikter jasalǵan.
«Trenıngte biz áıelderge tabıǵı qabiletterdi kásibı deńgeıge qalaı kóterý qajettigin aıtamyz. О́kinishke qaraı, bizdiń ortalyqqa keletin áıelder ózderiniń myqty jaqtarymen bóliskisi kelmeıdi, al keıbiri tipti óziniń qabiletteri jaıly oılanbaǵan. Tabysty adamdar bıznesti óziniń talanty men qabiletteri arqyly jasaıdy. Olar boıyndaǵy kásibı qabiletti qalaı tanyp, damytýǵa bolatyndyǵyn biledi. Olar ózderine laıyqty rólderdi taýyp, ózderiniń darynyn ómirde qalaı qoldaný kerektigin oılastyrady», - deıdi Aınur Ámirhan.
«Kásipker ana» bilim berý jobasynyń maqsaty – qarjylyq qıyn jaǵdaıdaǵy áıelderge qoldaý kórsetý. Olardyń qataryna kópbalaly analar, jalǵyzbasty analar, múgedek balalardy tárbıelep otyrǵan jáne qıyn áleýmettik jaǵdaıda turatyn analar jatady. «Aınur Ámirhan - motıvator. Trenıngten keıin men óz bıznesimdi bastaý úshin meniń kúshti jáne álsiz jaqtarym týraly jetkilikti bilmeıtinimdi túsindim. Bul aqparat bolmasa men jeke bıznesimdi bastaýǵa qorqaqtadym. Sebebi, men kún saıyn keshegi sheshimnen ózgeshe jańa bıznes-jobany qarastyrdym. Trenıng maǵan sheshim qabyldaýǵa kómektesti. Tulǵalyq myqty qasıetterimdi taldaý maǵan qyzmet salasyn tańdaýǵa múmkindik berdi», - deıdi trenıngke qatysýshy Baqyt Toqsanbaeva.
«Kásipker ana» jobasynda oqytý birneshe kezeńnen turady. Birinshi kezeń qabiletter men áleýetti anyqtaý úshin koýchıng sessııalaryn qamtıdy. Ekinshi kezeńde uzaq merzimdi oqytý mamandyq boıynsha praktıkalyq ıntensıv túrinde ótkiziledi. Úshinshi kezeń jeke bıznesti bastaýǵa kómek kórsetiledi.
Oqytý kelesi baǵyttar boıynsha júrgiziledi:
- sulýlyq ındýstrııasy (manıkıýr, pedıkıýr, shashtaraz, makııaj, kirpikterdi jalǵaý, permanentti makııaj);
- tamaq ónerkásibi (aspaz, kondıter aspaz, aspazshy);
- IT ındýstrııasy (grafıkalyq dızaın, kopıraıtıng, SMM);
- kásibı túrde sýretke túsirý;
- florıstıka.
