Máselen, koronavırýs ınfeksııasynyń taralýy boıynsha epıdemıologııalyq qaýpi joǵary elderdegi sheteldik mekemelerimizde jedel shtabtar quryldy, bizdiń azamattardy evakýasııalaý boıynsha is-áreketter algorıtmderi qabyldandy jáne konsýltasııalar berý maqsatynda «jedel jeliler» ashyldy.
Búgingi tańda Qytaıdan 480 qazaqstandyq evakýasııalandy. Qytaımen turaqty áýereısteri, jaıaý júrý beketteri, temir jol/avtomobıl jolaýshy tasymaly toqtatyldy. 2020 jylǵy 3 aqpannan bastap Qytaıdaǵy barlyq sheteldik azamattarǵa vıza berý toqtatyldy.
Bıylǵy 5 naýryzdan bastap Ázerbaıjanmen áýe reısteri qysqarady jáne Iran azamattarynyń Qazaqstanǵa kirýine tyıym salynady.
«Bizdiń azamattarǵa epıdemıologııalyq qaýpi joǵary elderge sapar shegýden qalys qalý usynyldy», — dedi M. Tileýberdi.
Qolda bar málimetter boıynsha, atalǵan elderde 95 myńnan astam azamattarymyz bar, onyń ishinde 35 myńy Koreıada, 40 myńy – Amerıka Qurama Shttatarynda, 5100 – Birikken Arab Ámirlikterinde, 5000 – Germanııada, 3000 – Ulybrıtanııada, 1800 – Italııada, 1000 – Fransııada. Olardyń basym bóligi — stýdentter, eńbek mıgranttary, sheteldegi mekemelerdiń qyzmetkerleri jáne olardyń otbasy músheleri, týrıster men bıznesmender.
«Epıdemıologııalyq ahýal ýshyqqan jaǵdaıda, qazaqstandyq azamattardy evakýasııalaý máselesi der kezinde qarastyrylatyn bolady. Búgingi tańda sheteldegi Qazaqstan azamattarynyń arasynda koronavırýspen aýyrǵan jaǵdaılardyń tirkelmegenin erekshe atap ótken jón», — dedi Syrtqy ister mınıstri.
Koronavırýs ınfeksııasynyń taralýy boıynsha epıdemıologııalyq qaýpi joǵary elderdegi ahýalǵa, sondaı-aq memleketterdiń koronavırýstyń taralýyna jol bermeý boıynsha shekteý sharalaryna monıtorıng jáne taldaý júrgizilýde.
Jasalǵan taldaý kórsetip otyrǵandaı, shet elder kelesi shekteý sharalaryn qabyldaýda:
- halyqaralyq ótkizý pýnktterinde jáne áleýmettik mańyzy bar nysandarda sanıtarlyq-karantındik baqylaýdy kúsheıtý;
- qaýpi bar eldermen vızalyq rejımdi ishinara nemese tolyq toqtatý, tipti memlekettik shekarany jabý;
- avıasııalyq, temirjol jáne avtomobıldik jolaýshylar qatynastaryn qysqartý jáne múldem toqtatý;
- ýaqytsha epıdemıologııalyq ortalyqtar jáne gospıtaldar salý;
- qoǵamdyq-buqaralyq jáne halyqaralyq is-sharalardy toqtatý.
«Sonymen qatar epıdemııanyń ekonomıka men jeke bızneske teris áserin boldyrmaý boıynsha sheteldik memleketter aldyn alý sharalar qabyldanýda. Mınıstrlik osy baǵyttaǵy jumysty jalǵastyrady», — dedi M. Tileýberdi.
