E. Toǵjanov atap ótkendeı, Memleket basshysy Q. Toqaev Qytaıda paıda bolǵan koronavırýstyń Qazaqstan aýmaǵyna taralýyna jol bermeý jóninde Úkimetke naqty uıymdastyrý sharalaryn qabyldaýdy tapsyrdy jáne jaǵdaıdy óziniń jeke baqylaýynda ustap otyr.
«Premer-Mınıstr Úkimet otyrysynda bul máseleni kún saıyn qaraýda. Arnaıy is-sharalar jospary bekitilgen. Atalǵan máseleni jiti qadaǵalaýda ustaý maqsatynda qurylǵan Úkimettik vedomstvoaralyq komıssııa turaqty jumys atqaryp, kúndelikti qajetti sharalar boıynsha naqty sheshimderdi iske asyryp otyr», — dedi vıse-premer.
Onyń aıtýynsha, osy ýaqytqa deıin 11 otyrys ótkizilip, tıisti organdarǵa 110-nan astam tapsyrma berildi.
Sonymen qosa, vırýstyń taralý aımaǵy qysqa merzim aralyǵynda jyldam artqanyn atap ótti. Búgingi tańdaǵy málimetke sáıkes, vırýs álem boıynsha 88,4 myń adamǵa juqqan, 3 myń adam qaıtys bolyp, 42,8 myńnan astam adam jazylyp shyqqan.
Álemde jaǵdaıdyń ýshyǵýyna baılanysty, Úkimet birqatar qosymsha sharalardy qabyldady.
Máselen, QHR-men jolaýshylar avtobýsynyń tasymaly, jolaýshylar poıyzynyń tasymaly men áýe qatynastary, jaıaý ótý toqtatyldy.
QHR-dan júk tasymalyn júzege asyratyn avtomobıl kólikteriniń júrgizýshileri úshin (27.02.2020 jaǵdaı boıynsha 22 avtomashına) medısınalyq baqylaý algorıtmi belgilendi. Búginde barlyq júk tasymaly tek temir jol arqyly ótedi.
«Biz shekarada barlyq qajetti sanıtarlyq sharalardy qabyldadyq. Qazaqstan aýmaǵyna kiretin adamdardy, onyń ishinde mashınalardy shekteý boıynsha sharalar qabyldandy. Olardyń eshqaısysy munda kelmeıdi. Avtomobıl júk tasymalyna qatysty naqty sharalar qabyldandy. Sońǵy táýlikterde nebári 10 avtokólik ótti. Iаǵnı, biz olardyń sanyn azaıttyq», — dedi vıse-premer.
E. Toǵjanovtyń aıtýynsha, bul sharalar Qazaqstan–Qytaı ózara qarym-qatynastarynyń ekonomıkalyq quraýyshyna qarsy, biraq olar qazirgi jaǵdaıda óte mańyzdy.
«Ekonomıka máselesi – bul asa mańyzdy másele. Aldyn ala málimetter boıynsha, tek Qytaı boıynsha 1%-ǵa deıin tómendeý kútiledi. Eger Qytaıdyń álem ekonomıkasyndaǵy 24% úlesin eskersek, árıne, bul másele kóptegen elderge, onyń ishinde Qazaqstanǵa da qatysty bolady. Alaıda aýqymdy ekonomıkalyq zııan shegetinimizdi túsine otyryp, biz adamdardyń qaýipsizdigi men densaýlyǵyna nuqsan keltirýge quqymyz joq. Biz úshin bul máseleniń ekonomıkalyq quraýyshynan góri, adamdardyń qaýipsizdigi men densaýlyǵy mańyzdyraq», — dedi Premer-Mınıstrdiń orynbasary.
Sonymen qatar, bıyl 1 naýryzdan bastap Koreıa Respýblıkasymen turaqty áýe reısteriniń sany 9-dan 3-ke deıin qysqardy. 1 naýryzdan bastap Iranmen jalǵyz áýe reısi toqtatyldy. 5 naýryzdan bastap Nur-Sultan – Tokıo áýe reısteri 2-den 1-ge deıin qysqartylady. 5 naýryzdan bastap Ázerbaıjanmen áýe reısi aptasyna 15 retten 3-ke deıin shekteledi, bul Baký reısimen Qazaqstanǵa Iranǵa baratyn Iran jáne Ázerbaıjan azamattarynyń ótetindigimen baılanysty.
Sonymen qatar E. Toǵjanov úshinshi elder arqyly birinshi sanattan azamattardyń kelýi erekshe medısınalyq baqylaýǵa alynǵanyn atap ótti. Birinshi jáne ekinshi sanattaǵy elder úshin sheteldik jumys kúshin tartýǵa ruqsattar berý toqtatyldy.
Vıse-premerdiń aıtýynsha, qazaqstandyq stýdentterge qatysty jaqsy jaǵdaı qalyptasqan, olardyń kóbisi demalys ýaqytynda Qazaqstanda júr. Olardyń sany shamamen myń adamdy quraıdy. Stýdentterdiń barlyǵyna Ońtústik Koreıaǵa shyqpaýǵa keńes berildi. QR BǴM-ge oryn alǵan jaǵdaıdy eskere otyryp, atalǵan JOO-lardyń basshylyǵymen oqytý merzimin sozý týraly kelissóz júrgizý týraly naqty tapsyrmalar berildi.
E. Toǵjanov vırýsqa qarsy sharalardy oryndaýǵa úlken jaýapkershilikpen qaraýǵa shaqyrdy.
«Qurmetti otandastar, bizdiń árqaısymyz mindetti túrde óz úıimizde, jumys ortasynda, áleýmettik ortada vırýsqa qarsy qatań sharalardy oryndaýymyz qajet. Bul Úkimettiń ǵana emes, árbir otbasynyń, árbir memlekettik organnyń, árbir uıymnyń jaýapkershiligi», — dedi Premer-Mınıstrdiń orynbasary.
Sonymen qatar, ol áleýmettik jeliler arqyly taratylatyn jalǵan aqparatqa senbeýge shaqyrdy. Jalǵan aqparat taratqany úshin zańǵa sáıkes qylmystyq jaýapkershilikke tartý qarastyrylǵan.
«Men osy máselege barlyqtaryńyzdan óte baıyppen qaraýdy suraımyn jáne jalǵan aqparatty taratqany úshin qylmystyq jaýapkershilikke deıin tıisti jaýapkershilik qarastyrylǵanyn eskertemin», — dedi E. Toǵjanov.
