«Atameken» qoldaý ortalyǵy» jobasy dál osy aýdanda kezdeısoq iske qosylǵan joq. Qordaı aýdanynda bolǵan sońǵy oqıǵalardan keıin ortalyq halyq arasyndaǵy áleýmettik shıelenisti jeńildetip, jumyssyzdyq pen kásipkerlik qyzmetke jumyldyrý máselelerin aıtarlyqtaı sheshýge kómektesýi kerek», – dedi «Atameken» UKP Basqarma Tóraǵasynyń orynbasary Eldar Jumaǵazıev ortalyqtyń ashylý rásiminde. Qordaı aýdanynda Jumyspen qamtýdyń mobıldi ortalyqtary – «Mádenıet úıi» jáne «Qarakemer» aýylynda ornalasqan.
«Mundaı ortalyqtar keshendi sharalardy kórsetedi. Bastysy, qoljetimdilik, aqparattylyq jáne jaýapkershilik. «Atameken» qoldaý ortalyǵy» jumyspen qamtýdyń mobıldi ortalyǵynda búgingi tańda Qordaı aýdanynda júrgizilgen saýalnama negizinde bos jumys oryndarynyń bazasy qalyptastyrylǵan. Bul 7 859 kásipkerlik sýbektisi. Jumyssyz adamdardyń ortalyqqa ótinim jasaýyn da keńesshiler bazamen qarap, olarǵa jumys oryndaryn usynady», – dedi Jambyl oblysy óńirlik kásipkerler palatasynyń dırektory Oljas Qarjaýov.
Sonymen qatar, Oljas Qarjaýov «Atameken» qoldaý ortalyǵy» jumyspen qamtýdyń mobıldi ortalyǵyn ashpas buryn Qordaı aýdanynda 4 myńǵa jýyq kompanııa saýalnamaǵa qatysqanyn, olar 111 bos jumys orny týraly habarlaǵanany aıtty. «Kompanııalarǵa satýshylar, baqtashylar, júrgizýshiler, satý jónindegi menedjerler, tiginshiler, traktorıst-mehanızatorlar, jumysshylar, saýynshylar, janarmaı quıý stansııalarynyń operatorlary qajet. Ortasha aılyq eńbekaqy 42 000-90 000 teńgeni quraıdy. Aıta keteıik, 2 kún ishinde «Atameken» qoldaý ortalyǵy» 90 adamǵa qyzmet kórsetti», – dedi Oljas Qarjaýov.
Jobanyń taǵy bir ereksheligi jumys isteý formatynda. Ár ortalyqta 3 menedjer jáne 1 jeke qabiletti damytý keńesshisi qyzmet kórsetedi. Jeke qabiletti damytý keńesshisi anaǵurlym laıyqty mamandyqty anyqtaý maqsatynda testileý ótkizedi, qandaı daǵdylardy damytý qajettigin aıtady. Osy rette «Atameken» qoldaý ortalyǵynyń» komandasy adamdardy qabyldap qana qoımaı, sondaı-aq, turaqty túrde halyqqa jaqyn bolyp, aýyldardy aralap, úıdi-úıge baryp, turǵyndarǵa jumyspen qamtýda qoldaý sharalary týraly aqparat beretin bolady.
Sonymen qatar, ótinim bergender «Eńbek» jumyspen qamtý jáne jappaı kásipkerlikti damytý baǵdarlamasy sheńberinde qysqa oqytý kýrstaryna qatysa alady. Oqytý kásiporyn bazasynda ótedi. Mundaı oqytý 1 aıdan 3 aıǵa deıin jalǵasady, shákirtaqy jáne ary qaraı jumyspen qamtý qarastyrylǵan. Budan bólek, atalǵan baǵdarlamanyń ekinshi baǵyty sheńberinde «Bastaý» jobasy boıynsha ótinim bergen jumyssyzdar jáne ózin-ózi jumyspen qamtyǵandar jas ereksheligine qaramastan bir aı boıy kásipkerlik negizderine oqyp, bıznes júrgizýde negizgi daǵdylardy ıgeredi. Ary qaraı joba túlekteri kásip ashýǵa mıkroqarjylandyrý jáne nemese 200 aılyq eseptik kórsetkish kóleminde grant ala alady. «Bastaý» jobasy sheńberinde byltyr Qordaı aýdany boıynsha 403 tyńdaýshy oqyp, sonyń ishinde 155 joba grant alǵan.
«Bul joba el Prezıdenti Qasym-Jomart Toqaevtyń 300 myńnan astam jumyssyz jáne ózin-ózi jumyspen qamtyǵandardy jumyspen qamtýǵa járdemdesý sharalaryn qolǵa alý jónindegi tapsyrmasy. Sondaı-aq, jumyspen qamtýdyń barlyq sharalaryn proaktıvti rejımge aýystyrý aıasynda iske asyrylýda. Búginde «Atameken» qoldaý ortalyǵy» Qordaı aýdanynan bólek Nur-Sultan, Almaty jáne Shymkent qalalarynda ashylǵan. 2019 jyly jumyspen qamtýdyń mobıldi ortalyqtary sheńberinde 81 109 adamǵa keńes berildi, 8787 adam «Bastaý» jobasymen oqýǵa jiberildi, 2834 adam «Jas kásipker» jobasymen oqydy. «Atameken» qoldaý ortalyǵy» jobasy arqyly 2403 adam jumysqa turdy. Osy oń tájirıbe jobany Qazaqstannyń basqa óńirlerinde de jalǵastyrýǵa negiz berip otyr», – dedi «Atameken» UKP Jumyspen qamtý máseleleri jónindegi departament dırektory Aıdana Toǵyzbaeva
Jambyl oblysy
