Ortalyqtyń maqsaty – oblystaǵy osal toptaǵy otbasylarǵa barlyq baǵytta keshendi kómek kórsetý. Nysannyń ashylý saltanatyna Jambyl oblysynyń ákimi Berdibek Saparbaev qatysyp, óz sózinde «Nur Otan» partııasynyń «Baqytty otbasy» jobasy aıasynda júzege asqan otbasy ortalyǵynyń osal toptarǵa ozyq úlgide qyzmet kórsetetinin ári tabysy tómen otbasylarǵa tıimdi usynystar beretinin aıtty. Atalǵan keshen 4 baǵytta jumys isteıdi. Psıhologııalyq, quqyqtyq jáne áleýmettik keńes baǵyty boıynsha munda turǵyndar kerek keńesterin alsa, «Baqytty otbasy» ıpotekalyq baǵdarlamasy boıynsha jumystardy úılestirý, jumyspen qamtý sharalaryn qamtamasyz etý, jomart jandardyń qaıyrymdylyq kómekterin uıymdastyrý sharalary iske asyrylatyn bolady. Ortalyqtaǵy psıhologtar, áleýmettik qyzmetkerler, zańgerler men medıatorlar halyqqa kerekti kómekterdi kórsetedi. Sondaı-aq, jeńildetilgen nesıe, qaıta daıarlaý jáne jumysqa ornalasý, áleýmettik tólemder men járdemaqylar tóleý máseleleri boıynsha túsindirý, aqparattandyrý jumystary júrgiziledi.
Turǵyndar úshin taǵy bir tıimdilik, «Baqytty otbasy» baǵdarlamasy boıynsha óńirdegi tabysy tómen otbasylarǵa «Qazaqstannyń Turǵyn úı qurylys jınaq banki» arqyly 2 paıyzdyq ıpotekalyq nesıe alýǵa kómek kórsetiledi. Búginde oblysta 32,6 myń kópbalaly, 15 myńǵa jýyq ataýly áleýmettik kómekke zárý otbasylar jáne 45,9 myń múmkindigi shekteýli azamattar bar.
Jambyl oblysy
