Jalpy, barlyq kezeńde ekonomıkanyń tabysty bolýy shaǵyn jáne orta bıznestiń damýymen tikeleı baılanysty ekeni anyq. Al memleket bul baǵyttaǵy jumysqa qarqyn berip, barlyq jaǵdaıdy qashan da daıyn. Almaty oblysynda da kásipkerlerdi yntalandyrý men memlekettik qoldaý da óz deńgeıinde eken. Byltyr shaǵyn jáne orta bıznesti qoldaýǵa qazynadan 11,8 mıllıard teńge jumsalypty. Nátıjesinde oblys boıynsha 48 myńnan astam jańa jumys oryny ashylǵan. Bir jyl ishinde otyz bir myń adam turaqty jumyspen qamtylypty.
Shaǵyn jáne orta bıznestiń aıaǵynan turyp, sharýasynyń dóńgelenýine memlekettik baǵdarlamalar da oń áserin tıigizip keledi. Onyń ishinde aımaqtarǵa paıdaly baǵyt retinde «Bastaý bıznes» jobasyn aıtýǵa bolady. Jetisýda jańadan is bastaýǵa osy jobanyń járdemi tıip otyr eken. Munyń artyqshylyǵy, yntasy bar adamdy bızneske baýlyp, óndiris pen ónerkásiptiń qyr-syryn meńgergennen keıin baryp, bıýdjet tarapynan qarjylandyrý tetikteri iske qosylady. Basqasha aıtqanda, kásipker iskerler naryǵyna qajetti daıyndyqpen keledi. Máselen, byltyr osy «Bıznes bastaý» jobasy aıasynda 4360 adam aranıy kýrstan ótip, iskerliktiń qyr-syryn meńgergen eken. Onyń ishinde alǵashqy alty aıda 1500 adam qajetti bilim alyp, memleket tarapynan qarjylaı qoldaýǵa ıe bolǵan. Al baǵdarlama boıynsha qarjylandyrylǵan 417 joba naqty júzege asypty.
- О́tken jyly «Atameken» ulttyq kásipkerler palatasynyń uıymdastyrýmen oblys turǵyndaryn bızneske baýlý baǵytynda birshama jumys isteldi. Alǵashqy kezeńde «Bastaý bıznes» jobasymen 1500 adam oqydy. Olardyń óz bıznesin bastaýyna jeńildetilgen nesıe men memlekettik granttar berildi. Alty aıda 417 adamǵa naqty kómek berilip, onyń ishinde 172 kásipker mıkronesıe jáne 245 adam grant ıegeri boldy. Al «Bastaý bıznes» jobasynyń ekinshi kezeńinde 2860 adam iskerlik álippesin oqyp, olar usynǵan 603 joba qarjylaı qoldaýǵa laıyq boldy, - deıdi «Atameken» ulttyq kásipkerler palatasy Almaty oblystyq fılıalynyń tóraǵasy Áset Shaıahmetov.
Aımaqtaǵy shaǵyn bıznestiń qalyptasýyna «Jas kásipker» jobasy da jaqsy kómek bolýda. Bul baǵdarlama 29 jasqa deıingi jastarǵa iskerliktiń qyr-syryn úıretip, óz bıznesin júrgizýge baǵyttalýymen qundy. Qazirdiń ózinde nátıje bar. Byltyr Almaty oblysy boıynsha 1450 jas kásipker osy baǵdarlama aıasynda daıarlyqtan ótipti. Bul tizimdegi 439 jas kásipkerdiń 439 jobasy memleket tarapynan maquldanyp, olarǵa «Eńbek» baǵdarlamasy boıynsha 200 aılyq eseptik kórsetkish mólsherinde grant alǵan.
Jalpy, shaǵyn jáne orta bıznestiń gúldenýi elimizdegi ortasha áleýmettik sanat úshin qol jetimdi kásip kózi men tabysty jumys orny retinde mańyzǵa ıe ekeni ras. Bul turǵydan alǵanda memleket óz isin ashýǵa ynta bildirgen tarapty qoldaýǵa múddeli. Iskerlik álipesin úıretý men qarjylaı qoldaýdan bólek kásip túriniń damýyna qolaıly orta týǵyzyp, ınfraqurlym jasaqtaýǵa atqarýshy bılik mindetti bolyp otyr. Almaty oblysynyń mysalynda aıtar bolsaq, ótken jyly dál osy shaǵyn jáne orta bızneske qolaıly óndiristik ınfroqurylymdy damytý úshin 11 joba jasalyp, oǵan 2,3 mıllıard teńge qarajat bólinipti.
Toq eterin aıtqanda, aımaqta «Bastaý bıznes» jobasy men «Jas kásipker» jobasy qarqyndy júrgen 2017-2019 jyl aralyǵynda turǵyndarǵa óz kásibin júrgizý úshin 2 657,5 mıllıard teńgeniń kóterme járdemi berilgen eken. Atap aıtqanda, iriktelgen 586 jobaǵa 2 082,5 mıllıon teńge jumsalyp, memlekettik grant boıynsha 1272 joba 574,8 mıllıon teńgege qarjylandyrylǵan eken.
Almaty oblysy
