Álem • 04 Naýryz, 2020

Nur-Sultan men Vılnıýs áriptestikti nyǵaıtpaq

15 retkórsetildi

Ekijaqty saıası konsýltasııalar barysynda Qazaqstannyń Syrtqy ister mınıstrligi men Lıtva Syrtqy ister mınıstrliginiń ókilderi saıası jáne ózara tıimdi saýda-ekonomıkalyq yntymaqtastyqty damytýǵa, sondaı-aq halyqaralyq arenada tyǵyz ózara árekettestikti qoldaýǵa daıyndyǵyn rastady. Bul týraly SIM baspasóz qyzmeti habarlady.

Qazaqstandyq delegasııany Syrtqy ister mınıstriniń orynbasary Marǵulan Baımuhan, lıtvalyq delegasııany Syrtqy ister vıse-mınıstri Dalıýs Chekýolıs basqardy.

Kezdesý barysynda taraptar ekijaqty yntymaqtastyq keń aýqymdy máseleleriniń jan-jaqty talqylady. Atap aıtqanda, elder arasynda senimdi saıası dıalogtyń ornatylǵany, al halyqaralyq kún tártibindegi kóptegen máseleler boıynsha ustanymdardyń tolyǵymen sáıkes kelýi erekshe aıtylyp ótti. Bul rette, ártúrli halyqaralyq alańdarda ózara qoldaý kórsetý eki el yntymaqtastyǵynyń ózindik stıline aınaldy.

Sondaı-aq delegasııalar prezıdenttik, parlamenttik jáne vedomstvolyq deńgeıdegi ózara saparlar kestesin birlese pysyqtaý usynysyn talqylady. Josparlanǵan kezdesýlerdi mazmundyq jaǵynan tolyqtyrý boıynsha keshendi daıyndyq jumystaryn bastaý týraly kelisimge qol jetkizildi.

Búgingi tańda eki eldegi parlamenttik «dostyq toptary» deńgeıinde qoldaý kórsetilip otyrǵan Qazaqstan men Lıtva arasyndaǵy parlamentaralyq dıalogty damytýǵa jáne keńeıtýge erekshe nazar aýdaryldy. Taraptar ekijaqty baılanystardyń osy segmentiniń mańyzdylyǵyn taǵy da rastady.

Saıası konsýltasııalardyń kún tártibindegi eń mańyzdy tarmaqtardyń biri saýda-ekonomıkalyq yntymaqtastyq boldy. Qazirgi ýaqytta Lıtva Qazaqstannyń Eýroodaq elderindegi eń iri saýda seriktesteriniń ondyǵyna kiredi. Qazaqstan, óz kezeginde, Lıtvanyń 15-shi saýda seriktesi bolyp tabylady.

Nátıjesinde, syrtqy saıası mınıstrlikter arasynda ekonomıkalyq dıplomatııa sheńberindegi ózara árekettestiktiń qarqyndylyǵyn arttyrý týraly kelisimge qol jetkizildi.

Konsýltasııalarǵa qatysýshylar Qazaqstan men Lıtva arasyndaǵy tranzıttik-kóliktik yntymaqtastyq burynǵydaı basymdyqqa ıe sala bolyp tabylatynyn aıtyp ótti. Atap aıtqanda, taraptar Qazaqstannyń Aqtaý men Quryq teńiz porttary jáne Klaıpeda teńiz porty arasynda baılanys ornatý múmkindigin talqylady. Budan basqa, 2020 jylǵy 18-22 mamyr aralyǵynda Lıtvada Kólik salasyndaǵy yntymaqtastyq jónindegi jumys toby men Halyqaralyq avtomobıl tasymaldary boıynsha aralas toptyń 4-shi otyrysy ótetini jaıynda aıtyldy.

Sonymen qatar, taraptar eki el arasynda tikeleı áýe qatynasyn ashý suraǵynyń ózektiligin, sondaı-aq «Nur-Sultan - Vılnıýs - Nıý-Iork» turaqty transkontınentaldyq áýe baǵytyn keleshekte qurý máselesiniń mańyzdylyǵyn atap ótti. Bul rette, taraptar týrıstik qarym-qatynastardyń, sonyń ishinde medısınalyq týrızmniń qazirgi jaǵdaıy men damý bolashaǵyn da talqylady.

Sonymen birge, dıplomattar, bilim jáne medısına salasyndaǵy baılanystardy odan ári jandandyrýǵa kelisti. Osy rette, lıtvalyq tarapqa qazaqstandyq stýdentterge 200 grant bólingeni úshin alǵys bildirildi.

Qazaqstan men Eýroodaq arasyndaǵy vızalyq rejımdi jeńildetý prosesinde Lıtvanyń kómek kórsetýi konsýltasııalardyń aıtarlyqtaı mańyzdy aspektisi boldy.

Qazaqstandyq dıplomat balamaly energetıka salasynda zamanaýı jabdyqtar, sonyń ishinde kún batareıalaryn jasap shyǵaratyn lıtvalyq BOD Group kompanııasynyń basshylyǵymen jeke kezdesý ótkizdi. Arnaıy prezentasııa barysynda oǵan jasyl energetıka salasyndaǵy eń jańa ázirlemeler, energııa únemdeýshi tehnologııalar oblysyndaǵy sońǵy jetistikter, shet elderdegi bıznes-jobalardy iske asyrýdyń nátıjeleri usynyldy. Kezdesýdiń qorytyndysy boıynsha BOD Group-tyń Qazaqstan naryǵyna shyǵý bolashaǵyn is júzinde zerdeleý týraly kelisimge qol jetkizildi.

Lıtvalyq sút qaýymdastyǵynyń basshylyǵy jáne Lıtvanyń jetekshi sút óndirýshilerimen bolǵan kezdesý barysynda M.Baımuhan olardy saýda seriktestigin damytýǵa jáne Qazaqstandaǵy sheteldik ınvestorlarǵa arnalǵan artyqshylyqtardy keńinen qoldanýǵa shaqyrdy.

Sońǵy jańalyqtar

Betperde kıgen kóktem - 6

Qoǵam • Búgin, 17:09

D dárýmeni - ınfeksııalardyń «jaýy»

Koronavırýs • Búgin, 16:47

Shymkent: Sıfrly otbasynyń bir kúni

Ońtústik Qazaqstan • Búgin, 15:58

Azııanyń ahýaly qandaı bolmaq

Ekonomıka • Búgin, 15:23

Olar úı betin kórmeı kúresýde

Aımaqtar • Búgin, 14:42

Karantın kartınasy (Trıptıh)  

Aımaqtar • Búgin, 13:15

Kókshetaýda «Aseptdezın» shyǵarylady

Aımaqtar • Búgin, 12:48

Almatydaǵy naýqastardyń jaǵdaıy baıandaldy

Koronavırýs • Búgin, 12:41

Haram nıet indeti

Aımaqtar • Búgin, 12:21

Atyraý: Depýtat kórsetken demeý

Qazaqstan • Búgin, 12:14

Atyraý: 1300 turǵyn testten ótti

Aımaqtar • Búgin, 11:45

Uqsas jańalyqtar