Koronavırýs álemdik sportqa da úlken qaýip tóndirip otyr. Aldymen Olımpıada oıyndaryna irikteý týrnırleri keıinge shegerilip, keıbir jarystardyp ótkizý qaýipsiz memleketterge aýystyrylǵan bolatyn. Keıin birneshe álem chempıonattary men álem kýbogi dodalarynyń ótpeıtini anyqtaldy. Tipti, Tokıo Olımpıadasy men fýtboldan Eýropa chempıonatynyń ótý-ótpeýi týraly másele qozǵala bastaǵany da jasyryn emes.
Tokıo Olımpıadasyna epıdemııa qaýpiniń tónip turǵany týraly aldymen HOK múshesi Rıchard Paýnd málimdedi. Ol 2020 jyldyń mamyr aıyna deıin koronavırýstyń aldyn alý sharalary júrgizilýi qajettigin eskertti. «Qaýipsizdik sharalaryna erekshe kóńil bólip, olımpıadalyq derevnıadaǵy tamaq quramyna asa mán berý qajet. Uıymdastyrý komıteti mamyr aıyna deıin qatysýshylar men qonaqtardyń qaýipsizdigin qamtamasyz etý kerek. Eger vırýs qarqyny báseńdemese, Tokıo Olımpıadasynyń ótpeý qalý qaýpi de bar», - dedi WADA-nyń burynǵy basshysy ári HOK-tyń eń egde músheleriniń biri Rıchard Paýnd 25 aqpandaǵy AR agenttigine bergen suhbatynda.
Keıin HOK prezıdenti Tomas Bah myrza álemdik BAQ-tarǵa suhbat berip, Olımpıada oıyndaryna qandaı da bir kedergi bolmaıtynyn málimdegen.
«Biz 24 shilde kúni Tokıoda Olımpıada oıyndarynyń ashylý saltanatyn ótkizýge daıyndalyp jatyrmyz. Biz osy kúnge jetý úshin birlese jumys isteýdemiz. Olımpıada oıyndaryna daıyndyq barysynda, ásirese, irikteý týrnırlerin ótkizý kezinde ulttyq olımpıadalyq komıtetter men federasııalardyń kúsh biriktirgeni qýantady. Bizdiń qazirgi mindetimiz – Olımpıadaǵa irikteý týrnırlerindegi qaýipsizdikti kúsheıtip, sportshylardyń densaýlyǵyna zııan keltirmeý. HOK barlyq elderdiń bıligimen jáne ulttyq olımpıadalyq komıttermen birlese otyryp 24 shildede ashylý saltanatyn ótkizýge nıetti», - dedi Bah naýryzdyń basyndaǵy suhbatynda.
HOK basshysy senimdi málimdeme jasady. Degenmen, vırýstyń beti beri qaramaıynsha tórtjyldyq dodasyn ótkizý de qıynǵa soqpaq. Epıdemııa oshaǵy Qytaımen kórshiles jatqan Japonııa koronvırýs juqtyrǵan memleketter kóshinde besinshi orynda keledi. Sondaı-aq, vırýstar kóz jumǵandar sany 3 naýryzdaǵy málimet boıynsha 12 adamǵa jetken. Ásirese, marafon men sporttyq júristen jarystar ótkiziletin Hokkaıdo prefektýrasynda koronavırýs qaýpi órship tur. Osyǵan oraı, Tokıo Olımpıadasyn uıymdastyrýshylar tórtjyldyq dodasyn sál keıinge shegerýdi usynyp otyr.
«Halyqaralyq olımpıada komıteti jazǵy oıyndar 2020 jyldyń sońyna deıin ótkizilmeıtin bolsa ǵana keıinge shegere alady. Demek, jyl sońyna deıin uıymdastyratyn múmkindik bar», - dedi Japonııa parlamentinde sóz alǵan Olımpıada jáne Paralımpıada oıyndary jónindegi mınıstr Seıko Hasımıto.
HOK mınıstrge dereý jaýap joldap, Olımpıada oıyndaryn dál ýaqytynda ótkizýge múddeli ekendikterin taǵy da málimdedi. Tomas Bah bastaǵan laýazymdy tulǵalar koronavırýs qaýpine qaramastan, sportshylardy Tokıo Olımpıadasyna daıyndalýǵa shaqyrdy. Búginde koronavırýsqa baılanysty birneshe álemdik jarystar shegerildi. Eń aldymen koronavırýstyń oshaǵy sanalatyn Ýhanda ótýi tıis bokstan Azııa/Okeanııa aımaqtyq irikteý týrnıri keıinge shegerildi. Aqpanda ótýi tıis boksshylar dodasy keshe Iordanııanyń Amman qalasynda bastaldy. Tokıo joldamasynan úmitti qazaqstandyq boksshylar búgin sharshy alańǵa shyǵady. Qytaıda ótýi tıis taekvondodan Olımpıadaǵa irikteý týrnırin de Amman qabyldaıtyn boldy.
Sonymen qatar koronavırýs qaýpine baılanysty kúres túrlerinen Azııa aımaqtyq irikteý týrnıri Qytaıdan Qyrǵyzstanǵa aýystyrylǵan bolatyn. Alaıda, sońǵy sátte Qyrǵyzstan bıligi de jarysty ótkizýden bas tartty. Qazaqstan tarapy da koronavırýstan saqtaný joldaryn bastap ketti. Prezıdent Qasym-Jomart Toqaevtyń jarlyǵymen elimizde ótýi tıis sporttyq jarystarǵa ruqsat berilgen joq. Aqpan aıynda Nur-Sultanda uıymdastyrylýy tıis sý dobynan Azııa aımaqtyq irikteý týrnıri men aýyr atletıkadan Azııa chempıonatyn ótkizýge tyıym salyndy. Velosportttan «Oman týry» kópkúndigi jarystyń aıaqtalýyna eki kún qalǵanda toqtatylsa, Ońtústik Koreıada 13-15 naýryzǵa josparlanǵan short-trekten álem chempıonaty belgisiz merzimge keıinge shegerildi.
Naýryzda Qytaıda uıymdastyrylatyn jeńil atletıkadan jabyq ǵımarattaǵy álem birinshiligi 2021 jyldyń enshisine qaldy. Álemdik sport qaýymdastyqtary shaıbaly hokkeıden, taý shańǵysynan, dzıýdodan ótýi tıis iri jarystardy ótkizýge shekteý qoıdy. Osy oraıda, Qazaqstan UOK-te koronavırýs qaýpine baılanysty málimdeme jasady.
«Ulttyq Olımpıadalyq komıtet úshin sportshylardyń densaýlyǵy óte mańyzdy. Saqtyq sharalarymen qatar, qaýipsizdik sharalaryn da kúsheıtý qajet. Bizde ulttyq federasııalarmen birge koronavırýstyń taralmaýy jáne qazaqstandyq sportshylardy indetten qorǵaý boıynsha aldyn-alý sharalaryna qatysty birtutas jáne berik ustanym bolýy kerek. Aldyn alý sharalarynyń barlyǵyn qoldaný kerek», - dedi UOK basshysy Tımýr Qulybaev.
Álemde koronvırýs juqtyrǵan adamdar sany 3 naýryz kúngi keshki málimetter boıynsha 92,314-ke jetti. Koronavırýs keńinen taralǵan elderdiń alǵashqy bestigine Qytaı (80 151), Ońtústik Koreıa (5186), Iran (2336), Italııa (2036) jáne Japonııa (2830) engen.
