Polıseıler kámeletke tolmaǵandar arasyndaǵy qylmystar men quqyq buzýshylyqtardyń aldyn-alý boıynsha jalpy sany 69 reıd ótkizgen. Nátıjesinde polısııa esebine 28 jasóspirim alynǵan. Kóktemgi merekeler qarsańynda atalǵan jumys jandandyrylýda. Reıd barysynda ıývenaldyq polısııa kósheler, aýlalar, dámhanalar men kompıýter klýbtaryn tekseredi.
Kezbe balalardyń ata-analary polısııaǵa shaqyrtylyp, profılaktıkalyq áńgime júrgiziledi. Birinshi retke eskertýmen shekteledi. Eger bir jyl ishinde jasóspirim qaıta ustalsa, zańdy ókiline ákimshilik kodekstiń talaby boıynsha ákimshilik hattama toltyrylyp, 7 aılyq eseptik kórsetkish túrindegi aıyppul salynady. Bul týraly qalalyq Polısııa basqarmasy ıývenaldyq polısııa bólimshesiniń bastyǵy, polısııa maıory Elmıra Abýsheva aıtty: «Reıdter barysynda kámeletke tolmaǵandar anyqtalǵan jaǵdaıda – ata-analary shaqyrtylyp, Ákimshilik quqyq buzýshylyq týraly Qazaqstan Respýblıkasy kodeksiniń 442-baby boıynsha eskertý túrindegi jazaǵa tartylady. Al bir jylda ekinshi ret qaıtalansa, joǵaryda aıtqanymdaı 7 AEK kóleminde aıyppul salynady», dedi ol.
Jyl basynan jumystyń atalǵan jelisi boıynsha 609 quqyq buzýshy jaýapkershilikke tartylyp, onyń ishinde balalarynyń túngi ýaqytta úıden tys jerde jáne kóńil-kóterý oryndarynda júrgeni úshin 362 ata-anaǵa aıyppul salynǵan. Iývenaldyq polısııa reıdterden basqa, tárbıesi qıyn balalardyń ata-analaryn da udaıy tekserip otyrady. Jyl basynan balalaryn tıisti tárbıelemegeni úshin 162 ata-ana jaýapkershilikke tartylypty. Qazirgi ýaqytta oblys boıynsha profılaktıkalyq jumystar júrgizilip turatyn 224 turmysy qolaısyz ata-ana esebinde tur eken.
PETROPAVL
