– Biz Sizben uzaq ýaqyttan beri jumys istep kelemiz. Árqashan til tabysyp, aramyzda túsinistik ornady. Men Prezıdent retinde ókilettiligimdi toqtatqanymdy bilesiz. Endi men zań boıynsha Qaýipsizdik Keńesiniń tóraǵasy mártebesine ıe boldym. Ekeýmiz taǵy da áriptes boldyq. Sondyqtan, jumys isteıik, syrtqy saıasat boıynsha pikir almasaıyq, – dedi Nursultan Nazarbaev.
О́z kezeginde Reseı Qaýipsizdik Keńesi tóraǵasynyń orynbasary memleketaralyq yntymaqtastyqtyń mańyzdylyǵyn aıtty.
– Meniń árbir jańa memlekettik qyzmetim syrtqy saıasat turǵysynan Qazaqstanǵa saparmen bastalyp keledi. Ol kezdeısoqtyq emes. Bul bizdiń odaqtastyq qatynasymyzdy bildiredi, sonymen qatar, Sizge degen qurmetimniń belgisi, – dedi D.Medvedev.
Áńgime barysynda Qazaqstan Respýblıkasy Qaýipsizdik Keńesiniń tóraǵasy keshe Máskeýde ótken Reseı men Túrkııa kóshbasshylarynyń Sırııa máselesi boıynsha kelissózderiniń qorytyndysyn qoldaıtynyn aıtty. Elbasy múddeli taraptardyń Sırııadaǵy jaǵdaıdy turaqtandyrý úshin Astana prosesiniń jalǵasýyna beıildiligi aıryqsha mańyzdy ekenin atap ótti.
Kezdesý sońynda Nursultan Nazarbaev pen Dmıtrıı Medvedev Qazaqstan Respýblıkasy Tuńǵysh Prezıdenti kitaphanasy kórmesiniń ekspozısııalarymen tanysty.
