«Ardaqty analar! Aıaýly arýlar! Sizderdi kóktemniń eń jarqyn meıramy - Halyqaralyq áıelder kúnimen shyn júrekten quttyqtaımyn! Názik jandylar sanaly túrde tańdap alatyn kásipteriniń qatarynda muǵalim, ǵalym, tárbıeshi mamandyqtary erekshe qurmetti orynda. Bilim berý salasynyń barlyq deńgeılerinde – mektepke deıingi, orta, qosymsha, kásiptik jáne tehnıkalyq, joǵary bilim berý, ǵylym salalarynda – eńbek etip kele jatqan áıelder Qazaqstannyń zııatkerlik bolashaǵyn qalyptastyrý barysynda úlken ról atqarady», - dep jazdy mınıstr óziniń facebook-paraqshasynda.
Onyń atap ótýinshe, mektepke deıingi bilim berý salasynda 94 201 áıel, orta bilim berý salasynda - 280 955 áıel, tehnıkalyq jáne kásiptik bilim berý salasynda - 27 850 áıel, joǵary bilim berý salasynda - 24 611 áıel, sondaı-aq, ǵylymı-zertteý jáne tájirıbelik-konstrýktorlyq jumystardy júzege asyratyn ǵylym salasynda qyzmet atqaratyn 9 217 zertteýshi-ǵalym áıel bar.
«Akademık te, ustaz da bolyp, bilim jáne ǵylym salasyna ólsheýsiz úles qosyp kele jatqan áriptesterimizge alǵysym sheksiz! Qymbatty áıelder, osy kóktem merekesinde Sizderge baqyt, densaýlyq jáne sáttilik tileımin! Aspanymyz ashyq bolyp, elimizde beıbitshilik pen turaqtylyq saltanat qursyn!» - dedi Ashat Aımaǵambetov.
