«Jaqyn arada biz ońtústik baǵytynda aýqymdy saýda jobasy – О́zbekstanmen shekarada «Ortalyq Azııa» halyqaralyq saýda-ekonomıkalyq yntymaqtastyq ortalyǵynyń (HSEYO) qurylysyn iske asyrýǵa kirisemiz. Bul týraly budan eki jyl buryn Memleket basshylary deńgeıinde ýaǵdalastyqqa kelgen bolatynbyz. Al naqty sharalardy biz áriptesimiz – О́zbekstan Respýblıkasynyń Investısııalar jáne syrtqy saýda mınıstri Sardor Ýmýrzakovpen talqyladyq.
Naýryzdaǵy áıelder merekesine qaramastan biz onymen keleshek HSEYO orny – «Jibek Joly – Gısht Kýprık» shekara beketinde kezdestik», - dep atap ótti Baqyt Sultanov. Onyń aıtýynsha, HSEYO – Ortalyq Azııa elderimen saýda yntymaqtastyǵymyzdyń mańyzdy elementi. Munda tek kóterme-bólshek saýda nysandary men olardyń ınfraqurylymy ǵana salynyp qoımaı, sondaı-aq mańyzdy kólik-logıstıkalyq ortalyq ta qurylady.
«Álemdegi ekonomıkalyq turaqsyzdyq, baǵanyń tómendeýi, koronavırýstyń halyqaralyq saýdaǵa qateri, týrızmniń básendeýi jaǵdaıynda kórshilermen saýdany qarqyndatý- daǵdarys qubylystaryn birge jeńýdiń eń ońtaıly tásili. Búginde Ortalyq Azııa - 71 mln adamnan astam halqy bar serpindi óńir. OA-da ishki aımaqtyq eńbek bólinisi úshin úlken múmkindikter bar, óńir elderi bir-birine tıimdi ótkizý naryǵy sanalady. Jáne bizdiń elderimizdiń qazirdiń ózinde ózara belsendi yntymaqtastyq jasaýynyń da mańyzy zor», - dedi mınıstr.
B.Sultanov dereginshe, 2019 jyldyń qorytyndysy boıynsha Qazaqstannyń Ortalyq Azııa elderimen taýar aınalymy 5,1 mlrd AQSh dollaryn qurady. Bul rette О́zbekstan óńirdegi iri saýda áriptesi sanalady.
Qazaqstannyń óńirmen ózara saýdasynyń 60 paıyzdan astamy atalǵan eldiń úlesine tıesili. О́zara saýdanyń ósý qarqyny 2017 jyldan bastap jalǵasýda jáne orta eseppen 30,7 paıyzdy quraıdy. О́zara saýda ótken jyly tórt mıllıardtyq shekten asyp, bes mıllıardqa jaqyndap qaldy.
