Elimizdiń erler quramasy alǵa qoıǵan josparyn 100 paıyzǵa oryndap, segiz joldamaǵa ıelik etti. Ásirese, biz barlyq qarsylastaryn qoǵadaı japyryp, altyn tuǵyrǵa kóterilgen Bekzat Nurdáýletov (81 kılo) pen Vasılıı Levıtke (91 kılo) rıza boldyq.
Aqtyq saıysta utylǵan Zákir Safıýllın (63 kılo) men Ábilhan Amanqul (75 kılo) kúmis medaldi enshiledi.
Serik Temirjanov (57 kılo), Abylaıhan Júsipov (69 kılo) jáne Qamshybek Qońqabaev (+91 kılo) qolaǵa qol sozdy.
Sáken Bıbosynov (52 kılo) shırek fınalda utylǵanyna qaramastan jubanysh báskesi arqyly Tokıoǵa baratyndardyń tizimine qosyldy.
Osylaısha, Qazaqstannyń erler komandasy Kún Shyǵys elinde alaýy tutanatyn Olımpııa oıyndaryna tolyq qurammen qatysatyn boldy.
Al áıelder quramasynyń jaǵdaıy múshkil. Ammanǵa attanǵan bes boksshynyń arasynan ǵalamdyq dodaǵa joldama alýǵa tek Nadejda Rıabestyń (75 kılo) qana kúsh-jigeri jetti. Qalǵan qyzdarymyz tegisteı utylyp, óz jankúıerlerin jerge qaratty. Endi sol olqylyqtyń ornyn kelesi lısenzııalyq týrnırde toltyrýǵa tıispiz.
