Taraz qalasynyń ákimi Aıtqazy Qarabalaevtyń aıtýynsha, Shalǵaı Qarasý turǵyn alqabynda 25 kelýshige arnalǵan dárigerlik ambýlatorııanyń qurylysyn júrgizýdi kásipkerdiń biri óz moınyna alyp otyr eken. Ol úshin arnaıy jer telimi de bólingen. Emdeý mekemesiniń qurylysy aǵymdaǵy jyly bastalyp, aıaqtalady dep kútilýde. Ambýlatorııa kelisim-shartqa sáıkes senimgerlik basqarýǵa beriledi. Sondaı-aq qazirgi tańda atalǵan alqapta turatyn 2 388 bala qalanyń túrli bilim oshaqtaryna qatynap oqıdy. Sondyqtan da jańa mektep salý qajettigi bar. Qala ákimdiginiń málimetinshe, aldyn-ala esepke sáıkes joba quny 2,1 mıllıard teńgeni qurap otyr eken. Degenmen, Berdibek Saparbaev 600 oryndyq mektep úshin bul óte joǵary baǵa ekenin, joba qunyn qaıta qaraý kerektigin eskertti. Bul oraıda ákim qurylys tek kelesi jyly, qujattamalar men memlekettik saraptamanyń qorytyndysy daıyndalǵannan keıin bastalýy múmkin ekendigin alǵa tartyp, ázirge balalardy tasymaldaý isin durys uıymdastyrý qajettigine kóńil bóldi. Sonymen qatar Shalǵaı Qarasýdyń jeti jańa turǵyn alqabyna aýyz sý men elektr jelilerin tartý da úlken máseleniń biri. Bul jumystarǵa bıýdjetten birinshi kezeńde 570 mıllıon teńge, ekinshi kezeńde 450 mıllıon teńge qarastyrý kerek eken. Búginde tıisti qujattary daıyndalý ústinde. Jobalardy júzege asyrý kelesi jyldyń josparynda. Sondaı-aq barlyq joldardy birden asfalttaý múmkin emes bolǵandyqtan, birqatar kóshelerge qıyrshyq tas tóselse, keıbir joldar aǵymdaǵy jyly jóndeýden ótpek.
Sonymen qatar Taraz qalasynyń ákimi Aıtqazy Qarabalaev jeke avtobýs parkteriniń qoǵamdyq kólikteri shetki aýdandarǵa qatynaı bermeıtinin atap ótip, kelesi konkýrs talaptarynda osyndaı tıimdilikterdi eskerý kerektigin aıtady. Atalǵan turǵyn alqaptaǵy taǵy bir másele – jergilikti kóshelerdiń tarylýy. Ondaǵy kóptegen turǵyndardyń ruqsatsyz ár túrli sharýashylyq qurylystaryn júrgizýi qoǵamdyq kólikterdiń qozǵalysy úshin yńǵaısyzdyq týǵyzýda. Jalpy, bul máseleler qalanyń barlyq saıajaı alqaptaryna ortaq.
Alqaptardy elektr jelilerimen qamtýǵa 1,5 mıllıard teńge, aýyz sýmen qamtamasyz etýge 2 mıllıard teńge qajet. «Tarazdyqtar qoǵamdyq kólikterdiń jaǵdaıyna jáne olardyń jumys kestesine shaǵymdanýda. Shaǵyn avtobýstardy yńǵaıly otandyq kóliktermen aýystyrý kerek. Qoǵamdyq kólik keminde 22:00 saǵatqa deıin jumys isteýge mindetti. Bul talap kelisim shartta naqty jazylýy tıis. Bıýdjettik baǵdarlamalar ákimshileri osy sharttyń oryndalýyn qatań baqylaýda ustaǵany abzal», dedi jıynda Berdibek Saparbaev. Sonymen qatar osy máseleni Taraz qalasy ákiminiń tıisti orynbasaryna tapsyrdy. Jıynda oblys ákimi saıabaqtardy, skverler men alleıalardy oblystyq basqarmalarǵa bekitý, Taraz turǵyndaryn tarta otyryp, aýqymdy senbilikter ótkizýdi bastaý týraly tapsyrmasyn qaıta nyqtady.
Jambyl oblysy
