Aımaqtar • 12 Naýryz, 2020

«Akademık Keńes Nurpeıis jáne qazaq memlekettiliginiń jańǵyrý tarıhy» ǵylymı-tájirıbelik konferensııasy ótti

274 retkórsetildi

Bıyl Qazaq KSR Memlekettik syılyǵynyń laýreaty, UǴA akademıgi Keńes Nurpeıistiń týǵanyna 85 jyl. Osy aıtýly dataǵa oraı  Sh.Ýálıhanov atyndaǵy Tarıh jáne etnologııa ınstıtýty qabyrǵasynda Keńes Nurpeıis atyndaǵy kabınet ashylyp, atalǵan ınstıtýt jáne Qazaq ulttyq qyzdar pedagogıkalyq ýnıversıtetiniń uıymdastyrýymen «Nurpeıis oqýlary» aıasynda «Akademık Keńes Nurpeıis jáne qazaq memlekettiliginiń jańǵyrý tarıhy» taqyrybynda halyqaralyq ǵylymı-tájirıbelik konferensııasy ótti.

Kórnekti ǵalym, akademık, tarıh ǵylymdarynyń doktory, professor, Qazaqstannyń eńbek sińirgen ǵylym jáne tehnıka qaıratkeri Keńes Nurpeıis 1946–1952 jyldary Almaty qalasyndaǵy № 18 Jambyl atyndaǵy er balalar orta mektebinde, 1952–1957 jyldary S.M. Kırov atyndaǵy QazMÝ-dyń tarıh fakýltetinde bilim alǵan. 1958 jyly Sh.Sh. Ýálıhanov Tarıh, arheologııa jáne etnografııa ınstıtýtyna ǵylymı qyzmetke shaqyrylǵan bilikti maman osy ınstıtýt qabyrǵasynda ómiriniń sońyna deıin qyzmet etip, kishi ǵylymı qyzmetkerden belgili ǵalym, tarıh ǵylymdarynyń doktory, professor, Ulttyq Ǵylym akademııasynyń akademıgine deıingi qıyndyǵy men ǵylymnyń qym-ǵýyt tirligi qatar órilgen jyldardan ótti. Qazaq qyzdar pedagogıkalyq ınstıtýtynda uzaq jyldar boıy oqytýshylyq qyzmetpen aınalysýy da ǵalym ómirindegi tájirıbesi mol jyldardyń qataryna endi.

Alqaly jıynǵa jınalǵan ǵalymdar qaýymy Sh.Ýálıhanov atyndaǵy Tarıh jáne etnologııa ınstıtýty qabyrǵasynda Keńes Nurpeıisuly atyndaǵy kabınettiń ashylý saltanatyna qatysyp, ǵalymnyń shákirtterine izgi tilekterin bildirdi.

«Konferensııaǵa belgili qoǵam qaıratkerleri men jetekshi ǵalymdardyń, jas tarıhshylar men BAQ ókilderiniń qatysýy – otandyq tarıh ǵylymynyń ózekti máseleleri boıynsha irgeli ǵylymı zertteýler júrgizgen jáne joǵary bilikti ǵylymı kadrlardy daıyndaýǵa belsene qatysqan, qazirgi zamandaǵy Qazaqstan tarıhynyń kúrdeli máselelerin zerttegen tanymal zertteýshi, akademık Keńes Nurpeıisulynyń ǵylymı murasyna degen úlken qyzyǵýshylyqtyń bar ekenin kórsetedi», deıdi uıymdastyrýshylar.

Q.Nurpeıis  500-ge jýyq ǵylymı jáne ǵylymı-kópshilik jumystardyń, sonyń ishinde jıyrmadan asa monografııanyń avtory. Ǵalymnyń zertteýleri 1916 jyly qazaq halqynyń ult-azattyq qozǵalysynyń, 1917 jyly eki revolıýsııanyń jáne 1918-1920 jyldarda azamattyq qaqtyǵystar tarıhyna, HH ǵasyrda ulttyq-memlekettik qurylys tarıhynyń, saıası qýǵyn-súrgin jáne Qazaqstannyń qoǵamdyq-saıası ómiriniń máselelerine arnaldy. Zertteýdiń alǵashqy nátıjeleri ǵylymı jurtshylyqtyń joǵary baǵasyn alǵan «Alash hám Alashorda» monografııasynda baıandalǵan.

Alqaly jıyn aıasynda moderator, Sh.Sh. Ýálıhanov at. Tarıh jáne etnologııa ınstıtýty dırektorynyń keńesshisi, s.ǵ.d., professor S.Borbasov,  aqyn, dramatýrg, QR Memlekettik syılyǵynyń laýreaty N.Orazalın, UǴA akdemıgi B.Qalıuly, ál-Farabı at. QazUÝ Ortalyq Azııadaǵy dástúrli órkenıetterdi zertteý ortalyǵynyń dırektory, t.ǵ.d., professor T. Omarbekov,  Reseı Federasııasynan professor D.Amanjolova, Qazaq ulttyq qyzdar pedagogıkalyq ýnıversıtetiniń dosenti T.Berlibaev, «Ádilet» tarıhı-aǵartý qoǵamy tóraǵasynyń orynbasary, t.ǵ.k. B.Qoıshybaı, Qazaq ulttyq qyzdar pedagogıkalyq ýnıversıtetiniń dekany J. Ashirbekova, «Ǵylym Ordasy» RMK qyzmetkeri, K. Nurpeıisulynyń kýrstasy Ǵ.Bıbatyrova sóz sóılep, t.b. baıandamashylar ǵalymnyń  ǵylymı murasyn taldap, tarıh ǵylymyndaǵy  jolyn saralady.  

Konferensııa barysynda arnaıy qarar qabyldanyp, onda jyl saıyn Qazaq memlekettik qyzdar pedagogıkalyq ýnıversıtetimen birge «Nurpeısov oqýlaryn» ótkizý, Qazaqstan ǵylymy tarıhynyń mýzeıine kelýshiler úshin akademık Keńes Nurpeıistiń murasymen tolyqtyrý, konferensııa materıaldaryn JOO-nyń tarıh kafedralary men kitaphanalaryna jiberý, jańadan ashylǵan Keńes Nurpeıisuly kabınetin materıaldarmen tolyqtyryp otyrý,  jańadan uıymdastyrylǵan bilim berý ortalyqtarynyń birine Keńes Nurpeıis esimin berý týraly ótinish jasaý men «Otan tarıhy» jýrnalynda búgingi halyqaralyq ǵylymı-tájirıbelik konferensııa jumysyna arnalǵan maqala jarııalaý týraly aıtyldy.

 

 

ALMATY

Sońǵy jańalyqtar

Juma: Almatyda 28 indet oshaǵy karantınde tur

Ońtústik Qazaqstan • Keshe

Almatyda zerthanalar sany artady

Ońtústik Qazaqstan • Keshe

Uqsas jańalyqtar