Álem • 12 Naýryz, 2020

Dımashtyń Kıevtegi konserti qalaı ótti?

348 retkórsetildi

Jarqyn júzder, kópshilik hor, súıikti ánshilerimen qosyla án shyrqaý, urandar jazylǵan plakattar men túrli elderdiń jalaýlary, tipti bireýleri qýanyshtan kóz jasyna erik bergen. Ýkraınanyń astanasy Kıev qalasyndaǵy «Arnau Tour»-dyń kezekti konsertinde osyndaı kórinis. Bul týraly dimashnews.com habarlady.

Dımashtyń mýzykalyq keshi bastalýda, al kórermender nazary tolyq sahnada, olar alǵashqy ándi asyǵa tosyp otyr. Sport saraıynda birde-bir oryn joq, kórermender lyq toly. Olardyń bireýi osyndaı keshke alǵash ret kýá bolyp otyrsa, bireýleri súıikti ánshisiniń jandy daýysyn taǵy bir estýge kelgen.

Dımash sahnaǵa ýkraın ulttyq kostıýmin kıip shyǵyp, zaldaǵy kópshiliktiń nazaryn ózine aýdardy. Aldymen ýkraın tilinde qymbatty jankúıerlerimen amandasqan ol kóp kúttirmeı shoýdy bastap ketti.

Ánshi shara barysynda kópshilikke búgin erekshe jaǵdaıdy bastan ótkergenin aıtty. Kıevtegi konserttiń ol úshin shyn máninde mańyzy joǵary, óıtkeni Dımashtyń talantyn osyndaǵy ádilqazylar da, tyńdaýshylar da alǵashqylardyń qatarynda moıyndaǵan. 2012 jyly Ýkraınada ótken «Shyǵys bazary» festıvalinde Dımash áıgili ári súıikti «Daıdıdaý» ánin barshaǵa alǵash ret usynǵan bolatyn. Dál osy televızııalyq konkýrsta ol óziniń tuńǵysh úlken júldesin jeńip alǵan edi.

Bul konsert Dımashtyń «Golden» atty jańa ánine beınebaıan túsirilip jatqandyǵymen erekshelenedi. Bul mýzykalyq shoýdyń eń jarqyn jáne áserli úzindileri men kórermenderdiń kóńil-kúılerin jınaıtyn tikeleı efırdegi klıp bolady.

Atalǵan kartına konsepsııasynyń basty ıdeıasy – Dımashtyń  qymbatty jankúıerlerimen altyndaı baǵaly baılanysy. Qoıylym kezinde Dımashtyń da, onyń tyńdarmandarynyń da ǵaryshtyq únqatysýy bolashaqta kópshilikke jol tartatyn «Golden» ániniń ataýyna tolyq sáıkes keledi.

Dımashtyń ýkraın tilinde án shyrqaǵany jankúıerler úshin keremet tosynsyı jáne jaǵymdy jańalyq bolǵanyn da aıtýǵa tıispiz. Ánshi áıgili ýkraınalyq mýzykant Volodımır Vermınıch jazǵan óte áserli, kópke tanymal «Chornobrıvsi» ánin oryndady, al onyń sózin aty ańyzǵa aınalǵan aqyn Nıkolaı Sıngaevskıı jazǵan.

«Chornobrıvsi» áni qaı kezde oryndalsa da ýkraındar arasynda erekshe sezim týdyrdy. Sondyqtan da Dımash osy týyndyny joǵary deńgeıde oryndap, konsertke qatysqan ár tyńdarmannyń júregine jol tapty dep bilemiz.

Án aıaqtalǵan kezde kórermender dý qol shapalaqtap, ystyq yqylastaryn bildirdi. Dımashtyń bul  kompozısııasy barlyǵynyń kóńilinen shyqqany sonshalyq, olar kóz jastaryna erik berdi.

Dımashtyń anasy Svetlana Aıtbaeva bul konserttiń shynymen erekshe bolǵanyn aıtady.

«Men de jyladym, qýanyshtan, tolqyǵannan, árıne! Sol sátte búkil zal toly kórermenniń jylap turǵanyn kórdim! «Chornobrıvsi» áni búgingi qonaqtardyń barlyǵynyń júregi men sezimine áser etti. Ýkraınaǵa osylaı jyly qabyldap, qoshemet kórsetkeni úshin analyq peıilimmen alǵysymdy bildiremin», dedi ol.

Sońǵy jańalyqtar

Kókshetaýda qara daýyl, qarly jańbyr

Aımaqtar • Búgin, 22:15

Tynyshtyqbek Ábdikákimuly. KARANTIN

Ádebıet • Búgin, 20:57

Almaty: Jolaýshylar aǵyny men kólik sany azaıdy

Ońtústik Qazaqstan • Búgin, 18:10

Betperde kıgen kóktem - 6

Qoǵam • Búgin, 17:09

D dárýmeni - ınfeksııalardyń «jaýy»

Koronavırýs • Búgin, 16:47

Shymkent: Sıfrly otbasynyń bir kúni

Ońtústik Qazaqstan • Búgin, 15:58

Uqsas jańalyqtar