Ustaý kezinde kúdiktiniń boıynan jáne úıinen 500 grammdaı sıntetıkalyq esirtki tabyldy jáne ózi de esirtki shegip alǵany anyqtalǵan. Bul óte úlken kólem dep baǵalanady. 28 jasar qyzyljarlyqtyń esirtki satýmen aınalysýy birinshi ret emes eken. Petropavl qalalyq PD esirtkige qarsy kúres bóliminiń bastyǵy Rahat Nurahmetovtyń aıtýyna qaraǵanda ol buryn da osyndaı qylmys jasaǵany úshin ustalǵan. «Onyń qamaýdan shyqqany byltyrǵy kóktemde ǵana bolǵan edi, endi taǵy da sol qylmyspen aınalysyp otyr. Qazir ol ýaqytsha oqshaýlaý ızolıatoryna qamaldy», dedi ol.
Birneshe gramm esirtki kúdiktini alyp júrgen taksıdiń salonynan da tabylǵan. Joǵaryda aıtylǵan kólemniń negizgi bóligi úıdi tintý barysynda tabylǵan. Sonymen birge úıde sıntetıkalyq esirtkini daıyndaıtyn konsentrat, elektrondy tarazy, oraıtyn jyltyr qaǵaz tabylǵan.
Mundaı qylmystardy anyqtaý men ustaý polısııa qyzmetkerleri úshin birneshe aı boıǵy talmas eńbekti talap etedi. О́tken beısenbide olar óz eńbekteriniń úlken nátıjesine qol jetkizip, esirtki jasaýmen jáne satýmen aınalysqan joǵaryda aıtylǵan kúdiktini qolǵa túsirdi. Aıta ketetin bolsaq, ótken kúzde olar Aqqaıyń aýdanynda esirtki jasaý zerthanasyn da tapqan. Al bıylǵy jyldyń basynan 37 nashaqordy ustap otyr. Olardyń boıynan jáne turatyn jerlerinen 1400 gramm esirtkilik zattar tabylǵan.
Soltústik Qazaqstan oblysy
