«Qazaqstan Respýblıkasynda koronavırýstyq ınfeksııasy taralýynyń aldyn alý sharalaryn kúsheıtý týraly» Úkimet sheshimine sáıkes el aýmaǵynda, onyń ishinde Almaty qalasynda buryn josparlanǵan is-sharalardy kóshirý nemese toqtatý týraly sheshim qabyldandy. Qalalyq mádenıet basqarmasy birqatar shekteýlerdi engizdi.
2020 jyldyń 13 naýryzynan bastap qala aýmaǵynda barlyq buqaralyq mádenı is-sharalar, konferensııa, semınarlar, kórmelerdi ótkizýge ýaqytsha tyıym salyndy. Halyqaralyq mádenı is-sharalarǵa barý maqsatynda 1A, 1B, 2 jáne 3 sanattaǵy elderge shyǵýǵa shekteý engizildi. Shahardyń barlyq tıisti uıymy men mádenıet mekemelerine óz uıymdarynyń aýmaǵynda qajetti quraldarmen: sanıtaızerler, antıseptıkter jáne koronavırýstyq ınfeksııanyń aldyn alý jónindegi jadynamalarmen qamtamasyz etýde sanıtarlyq-profılaktıkalyq is-sharalardy kúsheıtý jóninde usynystar bildirdi.
Qalada 2020 jyldyń birinshi jartyjyldyǵyna 40-tan astam is-shara josparlanǵan. Onyń ishinde, búgingi tańda 14-i toqtatylsa, qalǵan 26 shara aǵymdaǵy jyldyń ekinshi jartyjyldyǵyna aýystyryldy. Mádenı-buqaralyq is-sharalardyń kúntizbelik josparyna sáıkes monıtorıngtiń qorytyndysy boıynsha naýryz-sáýir aılarynda mádenı oıyn-saýyq uıymdary boıynsha 211, al teatrlarda 383 is-sharaǵa shekteý qoıyldy. Qala boıynsha barlyǵy 608 is-shara toqtatyldy.
Sondaı-aq búginde qalada barlyq kınoteatrlar, haıýanattar baǵy, murajaılar, kitaphanalar jumysyn toqtatty.
Bilim berý mekemeleriniń jumys isteý formaty túsindirildi
Epıdemıologııalyq jaǵdaı turaqtanǵanǵa deıin qosymsha bilim berý nysandarynda (oqýshylar úıi, mýzykalyq mektepter) bilim berý prosesin júrgizýge tyıym salyndy. Sonymen qatar balalardyń orny saqtalady, ata-analardan oqý aqysy alynbaıdy. Jalpy, Almatyda 266 mektep, 80 kolledj bar. 16 naýryzdan bastap mektepterde demalys jarııalandy. Oqýshylarǵa demalys kezinde ekskýrsııaǵa barýǵa tyıym salyndy. Kolledj stýdentteri 16 naýryzdan bastap qashyqtan bilim alýǵa kóshedi.
Sporttyq uıymdar oqytý-jattyǵý prosesterin toqtatty
Almatyda barlyǵy 14 kommýnaldyq sport nysany bar. Onyń ishinde 9-y balalar men jasóspirimderge arnalǵan sport mektebi. Sportpen shuǵyldanatyndar 12 myńnan astam adamdy quraıdy. 13 naýryzdan bastap barlyq memlekettik sport mektepterinde oqý-jattyǵý prosesi toqtatyldy.
Jergilikti jáne respýblıkalyq bıýdjet qarajatynan qarjylandyrylatyn sport kásiporyndaryndaǵy oqý-jattyǵýlary, fızıkalyq-saýyqtyrý qyzmetterin usyný jáne sport salasyndaǵy áleýmettik jobalardy iske asyrýǵa da shekteý qoıyldy.
Jeke sport uıymdaryna sport salasynda kórsetiletin qyzmetterdi ýaqytsha toqtatý jóninde usynymdar berildi. Atap ótetin jaıt, birqatar uıymdar, sonyń ishinde, qala turǵyndary da bul usynystarǵa túsinistik bildirdi.
Sonymen qatar barlyq sport túrleri boıynsha qalalyq qurama komandalarynyń músheleri Qazaqstan Respýblıkasynan tys jerlerge shyǵýyna shekteý qoıyldy. Sondaı-aq megapolıs aýmaǵynda halyqaralyq sporttyq sharalar da toqtatyldy.
Almatydaǵy 4 naýqastyń bireýi ortasha aýyr jaǵdaıda
Bul týraly Almaty qalasy qoǵamdyq densaýlyq saqtaý basqarmasynyń jetekshisi Tileýhan Ábildaev brıfıng barysynda aıtty.
«Naýqastardyń barlyǵy Qazaqstan azamattary. Birinshi naýqas 10 naýryz kúni Qazaqstanǵa kelip, úı karantıninde bolǵan. Koronavırýs anyqtalǵan taǵy bir azamat 13 naýryzǵa qaraǵan túni Berlın-Almaty baǵytynda charterlik reıspen kelgen. Borttaǵy barlyq jolaýshylar men ekıpaj músheleri birden karantınge jatqyzylyp, tıisti medısınalyq zertteýler jasaldy. Al vırýs juqtyrdy degen úshinshi azamat charterlik reıspen kelgen naýqastyń jubaıy. Búgin anyqtalǵan tórtinshi naýqas Máskeý-Almaty reısimen 10 naýryz kúni ushyp kelgen. Baılanysta bolǵan barlyq adamdar qazir anyqtalyp jatyr» dedi Tileýhan Ábildaev.
«3 naýqastyń jaǵdaıy qanaǵattanarlyq. Bireýi ortasha aýyr jaǵdaıda. Vırýsqa qarsy jáne sımptomatıkalyq terapııa erejege sáıkes ýaqytynda bastaldy» dedi Tileýhan Ábildaev.
ALMATY
