Qoǵam • 16 Naýryz, 2020

Mınıstr balalardy úıde qaldyrýǵa keńes berdi

64 retkórsetildi

Bul týraly Bilim jáne ǵylym mınıstri Ashat Aımaǵambetov Facebook paraqshasynda jazdy.  

«Memleket basshysy Qasym-Jomart Toqaev Úkimetke halyqty koronavırýstyq ınfeksııadan qorǵaý sharalaryn kúsheıtýdi mindettegenin bilesizder. Qazaqstan Respýblıkasynyń Prezıdentiniń tapsyrmasyn oryndaý aıasynda tıisti jumys atqarylýda.

Bilim berý uıymdaryna, mınıstrlikke qarasty mekemelerdiń jumysyna, pedagogter men oqýshylardyń ózara is-qımylyna, oqý prosesin uıymdastyrýǵa qatysty tapsyrmalar kórsetilgen Bilim jáne ǵylym mınıstrliginiń arnaıy buıryǵy jiberildi:

1.Mektepke deıingi bilim berý mekemeleri shtattyq rejımde jumys isteýde. Balabaqshaǵa balalardy aparý nemese aparmaý máselesi ata-analarynyń qalaýyna baılanysty. Kelmegeni úshin balabaqshadan shyǵarylmaıdy. Iаǵnı, balańyzdy balabaqshaǵa aparmasańyz, orny saqtalady. Sondyqtan ata-analarǵa múmkindiginshe búldirshinderdi úıde qaldyrýǵa keńes beremin.

2. 16 naýryzdan bastap memlekettik qosymsha bilim berý uıymdarynyń qyzmeti toqtatyldy. Oǵan oqýshylar men jasóspirimder saraıy, mýzyka, kórkemsýret, óner mektepteri jáne t.b. jatady. Qazaqstan Respýblıkasynyń BǴM Balalardyń quqyqtaryn qorǵaý komıteti qazirgi jaǵdaıdy eskere otyryp, ata-analarǵa balalaryn jekemenshik damytý ortalyqtaryna da aparmaýǵa keńes beredi.

3. 2020 jylǵy 16 naýryzdan bastap 5 sáýirge deıin balalar kóktemgi demalysta bolady. Osy ýaqyt aralyǵynda mektep muǵalimderi qashyqtyqtan jumys isteıdi. Áriptesterimizge ádistemelik jáne sabaqqa daıyndyq jumystaryn úıde otyryp oryndaýǵa bolady. Al mektep dırektorlary pedagogterdiń qashyqtyqtan jumys isteýi jáne kanıkýl kezinde atqarylatyn jumys kólemine saı aılyqty tolyq tóleý týraly aktilerdi qabyldaıdy.

Kanıkýl aıaqtalǵan soń, qajet bolǵan jaǵdaıda, oqýshylardy qashyqtyqtan oqytý úshin daıyndyq jumystary júrgizilýde. Bul turǵyda arnaıy top aqparattyq júıeni kontentpen qamtamasyz etý, pedagogterdi úıretý, servısterdi testileý jáne t.b. baǵyttar boıynsha jumys atqarýda. Uıymdastyrý jumystaryn 5 sáýirge deıin aıaqtaýymyz qajet. Bizde birneshe elektrondy platforma bar, qarqyndy jumys júrgizilýde.

4. 16 naýryzdan bastap kolledjder men JOO stýdentteri qashyqtyqtan oqytý tehnologııalary negizinde bilim alýǵa kóshýde. Oqytý prosesi bekitilgen oqý júktemesine, josparyna, baǵdarlamasy men kestege saı júrgiziledi.

5. Oqý prosesin uıymdastyrý úshin pedagogter men stýdentterge elektrondyq platformalarǵa kirýge jaǵdaı jasalady. Oqytý quraly retinde vıdeo-sabaqtar, derbes onlaın-jumys, onlaın-kýrstar paıdalanylady. Bizde «Bilimland», «Google Classroom», «MOODLE», «Univer», «Platonus», «Canvas», «Daryn.online» syndy jaqsy júıeler bar. Sondaı-aq «Coursera» óz kýrstaryn tegin usyndy jáne «ZOOM» oqytý barysynda servısti tegin paıdalanýǵa jaǵdaı jasady.

Eske salaıyn, joǵary oqý oryndary úshin qashyqtyqtan oqytý júıesi jańashyldyq emes. QR BǴM buıryqqa qol qoıǵan sátten bastap, arnaıy tehnologııalardy paıdalanyp júrgen keıbir JOO onlaın-formatta oqytýdy bastap ketti.

Tehnıkalyq jáne kásiptik bilim berý uıymdarynda qashyqtyqtan oqytý shamaly kúrdeli jaqtary bar. Degenmen de kolledjderdiń basym bóligi tıisti júıe boıynsha jumys istep kórgen. Qalǵandary qatarǵa qosylýda. Qazirgi ýaqytta arnaıy júıelerge kontent júkteý, OÁK engizý, SBR boıynsha úlken jumys atqarylýda.

Kolledjder men joǵary oqý oryndarynyń pedagogteri de qashytyqtan jumys isteýine jaǵdaı jasalaýy kerek. JOO men kolledj basshylaryna osyǵan qatysty tıisti tapsyrmalar berdim.

6. Jataqhanalarǵa qatysty saýaldar jetkilikti. Bılet nemese qarjy tapshylyǵy synda ártúrli jaǵdaılarǵa baılanysty qaladan kete almaıtyn stýdentter jataqhanalarda tura beredi. Biraq olar tek óz bólmelerinde bolýlary tıis.

7. Pedagogterdiń biliktiligin arttyrý kýrstary onlaın-formatta ótkiziledi. Keıbir kýrstardyń ótkizý merzimi aǵymdaǵy jyldyń ekinshi jartyjyldyǵyna aýystyryldy.

8. Jalpy bilim beretin pánder boıynsha oqýshylardyń respýblıkalyq olımpıadasy men aýyl mektepterine arnalǵan «Myń bala» Ulttyq zııatkerlik olımpıadasynyń IV kezeńin jáne basqa da konkýrstardy ótkizý merzimderi keıinge shegerildi.

9. Bilim alýshylar men tárbıelenýshilerdiń halyqaralyq sporttyq, mádenı, týrıstik is- sharalarǵa qatysýyna tyıym salyndy. Sondaı-aq buqaralyq is- sharalar ótkizýge bolmaıdy.

10. Bilim berý uıymdaryna bilim berýdiń barlyq deńgeıleri boıynsha oqý prosesin uıymdastyrý jónindegi QR BǴM-niń ádistemelik usynystary berildi. Qajet bolǵan jaǵdaıda olar jańartylyp otyrady.

Pandemııa kezeńinde kem degende 15 memleket mektepterdi ýaqytsha jabý týraly sheshim qabyldaǵan. Taǵy 14 eldiń belgili bir óńirlerinde orta bilim berý uıymdarynyń jumysy toqtatyldy. Osylaısha, mektepterdi ýaqytsha jabý máselesi Azııa, Eýropa, Taıaý Shyǵys jáne AQSh sııaqty memleketterdi aınalyp ótpedi.

Osyǵan baılanysty balalar men stýdentterge bilim berý jáne oqý prosesiniń úzdiksiz jalǵasýyn qadaǵalaý basty nazarǵa alynyp otyr.

Bul bizdiń eldegi bilim berý júıesi úshin úlken syn ári mańyzdy mindet. Alǵa qoıǵan tapsyrmalardy bizdiń pedagogter, ata-analar, oqýshylar men stýdentterimizdiń belsendi atsalysýy arqyly birge oryndaımyz dep senemin» dep jazdy ol.

Sońǵy jańalyqtar

Taraz qalasy karantınge jabylady

Aımaqtar • Búgin, 21:48

Asqar Altaı. VIRÝS-MÝTANT (Novella)

Ádebıet • Búgin, 19:07

Tankerlerdiń qaıda baratyny belgisiz

Ekonomıka • Búgin, 18:32

Ár teńge úshin esep berýge daıynbyz

Ekonomıka • Búgin, 17:01

Esik nege «tesik»?

Qoǵam • Búgin, 15:25

Betperde kıgen kóktem - 5

Qoǵam • Búgin, 15:10

Qyzylorda oblysy: Taǵy 3 adam vırýs juqtyrdy

Koronavırýs • Búgin, 13:31

COVID-19 vırýsy mysyqtan tabyldy

Álem • Búgin, 12:03

Syrdarııaǵa jylanbalyq qaıdan kelgen?

Aımaqtar • Búgin, 11:32

Koronavırýs hám kóshe sýretteri

Álem • Búgin, 10:51

Uqsas jańalyqtar