Qytaı Halyq Respýblıkasynyń Almatydaǵy Bas konsýldyǵy 15 naýryzdaǵy saǵat 24.00 kezindegi jaǵdaıǵa sáıkes, Qytaı elinde koronavırýs juqtyrý jańadan 16 adam ǵana rastalǵanyn málimdedi. Olardyń 4-eýi Ýhanda bolsa, 12 adam basqa memleketterden kelgen.
Kórshilerimiz besinshi kún qatarynan indet oshaǵy bolǵan Ýhan qalasynda koronavırýs birdi-ekili adamnan ǵana tabylyp jatqanyna qýanyp otyr. Epıdemııa qutyrynyp turǵan kezde kún saıyn 3 myńnan astam vırýs juqtyratyn bolsa, sońǵy kúnderi jıyrmaǵa da jetpeıtin adamda ǵana koronovırýs bar ekeni anyqtalyp otyr.
Bir aıdyń ishinde indet 98 paıyzǵa jeńildi.
Qazir Qytaıdyń qurlyqtyq bóliginde 9898 oqıǵa tirkelgen. Onyń ishinde 9605 adam - Hýbeı provınsııasynyń turǵyny.
Qazir kún saıyn 800-900 naýqas saýyǵyp, úılerine oralyp jatyr. Kún saıyn Hýbeı provınsııasynan tysqary jerde juqtyrý oqıǵalary azaıyp keledi. Jańa juqtyrý oqıǵalary tirkelgen jaǵdaıda da – olar basqa memleketterden kelgender.
Kóptegen qala men provınsııalarda koronavırýstyń anyqtalýy nóldik deńgeıge jetti. Joǵaryda atap ótilgendeı, indetten saýyqqan adamdardyń sany aıtarlyqtaı ósip keledi.
