Eń bastysy, Almaty birinshi kezektegi qajetti azyq-túlik taýarlarymen, sondaı-aq betperde jáne zalalsyzdandyrý quraldarymen tolyq qamtamasyz etilgeni týraly qalalyq ákimdikte ótken baspasóz máslıhatynda qala ákiminiń orynbasary Saparbek Tuıaqbaev málimdedi. О́ıtkeni karantın kezinde as-sýsyz qalamyz dep úreılengen turǵyndardyń kópshiligi úıine tamaq tasýǵa kóshkenin kórip otyrmyz. Osy dúrmekke ilesip, dúkenderde uzyn-sonar kezekterdiń paıda bolýyna úlesin qosyp jatqandar da jetkilikti. Sondyqtan da halyqqa aldymen sabyr kerek. Alaıda saqtyq sharalary suralǵanyna qaramastan, betperdesiz qalada josyp júrgen halyq...
Sonymen S.Tuıaqbaevtyń aıtýynsha, turaqtandyrý qoryna shamamen 18 myń tonna áleýmettik mańyzy bar negizgi azyq-túlik taýarlary satyp alynǵan. Bul – qant, kúnbaǵys maıy, qaraqumyq, kókónis, taýyq eti. Barlyq ónimder Magnum jáne Small saýda jelileri arqyly satylady. Aldaǵy ýaqytta turaqtandyrý qoryna qosymsha qarajat bólinedi.
«Bizde áleýmettik mańyzy bar azyq-túlik taýarlarynyń barlyq 19 túrin jetkizip berýshiler bar. Biz baǵasy jáne jetkizý kólemi týraly anyqtap aldyq. Sondyqtan dúrbeleń bolmaýy kerek. Sońǵy eki-úsh kúnde saýda jelilerinde ýaqytsha osyndaı jaǵdaılar oryn aldy. Biraq biz taýarlardy ýaqytynda jetkizdik. Qaladaǵy qoımalarda barlyq qajetti zattar bar», dedi S.Tuıaqbaev.
Qala ákiminiń orynbasary azyq-túlik qaýipsizdigi boıynsha arnaıy shtab qurylǵanyn, ár aýdan ákimdiginiń deńgeıinde jaýapty qyzmetkerler anyqtalǵanyn málimdedi. Sondaı-aq baǵanyń negizsiz kóterilýi anyqtalǵan jaǵdaıda tıisti sharalar qabyldanatynyn alǵa tarta kele: «Barlyq másele baqylaýda. Búgingi tańda bizde baǵanyń kóterilýi boıynsha qaýip joq. Taýarlardyń negizgi bóligi – otandyq ónim», dedi.
Dárihanalardy betperdeler jáne zalalsyzdandyrý quraldarymen qamtamasyz etýde qala ákimdigi otandyq zalalsyzdandyrý quraldaryn, sanıtaızerlerdi óndirýmen aınalysatyn «Avrora Holding» jáne betperdelerdi jetkizetin «Dolce Pharm» kompanııasymen kelisimge qol qoıǵan.
Ákim orynbasarynyń aıtýynsha, qala bıligi 20-ǵa jýyq iri dárihanalyq jelileriniń ókilderimen kezdesýler ótkizip, birinshi kezektegi qajetti dári-dármekterdiń baǵasyn baqylaý jáne onyń jetkilikti kólemin qamtamasyz etý boıynsha ýaǵdalastyqqa qol jetkizdi.
Qala ákimdiginde belgili bolǵandaı, qoǵamdyq kólik quraldaryn óńdeý kúndelikti ári mindetti sharaǵa jatqyzylady. Bul shara memlekettik jáne jeke avtokólikterge qatysty. Avtokólik parkteriniń sanıtarlyq jaǵdaıyn tekserý júrgiziledi. Talaptar oryndalmaǵan jaǵdaıda olar jazaǵa tartylmaq.
Sol sııaqty Almatydaǵy azyq-túlik «dúrbeleńinen» keıin qala bıligi ótkizgen baspasóz jıynynda Kásipkerlik jáne ınvestısııalar basqarmasynyń basshysy Erkebulan Orazalın «azyq-túlik qory jetkilikti, dúrbeleńge negiz joq» dep málimdedi.
Qala bıliginiń dereginshe, almatylyqtar aı saıyn 860 myń tonna áleýmettik taýar tutynady. Onyń 240 myń tonnasy Almatyda óndiriledi. 520 myń tonnaǵa jýyq azyqtyń 90 paıyzy basqa óńirlerden kelip jatyr. Eń bastysy, qandaı jaǵdaıda da qala bıligi áreketsiz otyrǵan joq. Halyq sabyrly bolyp, aqylmen áreket etse, quzyrly mekemeler ózderine artylǵan mindetti oryndap, máselelerdi retteýge umtylyp otyr.
ALMATY
