B.Sultanov azyq-túlik qaýipsizdigin qamtý maqsatynda Qazaqstan aýmaǵyndaǵy barlyq saýda nysandary jumysyn tártipke sáıkes jalǵastyratynyn jetkizdi. Atap aıtqanda, azyq-túlik dúkenderi, dárihanalar, saýda ortalyqtary, gıpermarketter men bazarlar kúndelikti qyzmetterin kórsetedi. Degenmen olar birqatar talapty saqtaýy mindetti.
– Densaýlyq saqtaý mınıstrligi jáne elimizdiń bas sanıtarymen birlesip, qosymsha qaýipsizdik jumystaryn pysyqtadyq. Birinshiden, bul zararsyzdandyrý jumysy rejimin kúsheıtýge baılanysty. Eń bastysy, uzyn-sonar kezekti boldyrmaǵan abzal. Eger mundaı jaǵdaı oryn alsa, adamdar arasyndaǵy qashyqtyq bir metrden kem bolmaýy tıis. Iri saýda nysandary kelesi talaptardy saqtaýǵa mindetti. Atap aıtsaq, betperdesiz kelýshilerdi nysannyń aýmaǵyna kirgizýge shekteý qoıylady nemese olardy betperdemen qamtý qajet. Mindetti túrde koronavırýstyń aldyn alý týraly paraqsha taratylýy tıis. Barlyq kireberisterde dene qyzýyn anyqtaıtyn qondyrǵy ornatylýy qajet. Iri saýda oryndary men bazarlardyń jumys ýaqyty ózgeredi. Azyq-túlik bazarlary saǵat 10:00-18:00 aralyǵynda jumys istese, kıim-keshek saýdalaıtyn oryndar saǵat 11:00-17:00 aralyǵynda ashyq bolady. Biraq saýda nysandarynda barlyq sanıtarlyq jáne zararsyzdandyrý sharalaryna jan-jaqty kóńil bólinýi tıis. Saýda-oıyn ortalyqtaryna toqtalsaq, olardyń oıyn-saýyq bólimderi jumystaryn toqtatýǵa mindetti. Degenmen sonyń ishinde ornalasqan azyq-túlik nysandarynyń qyzmetine shekteý qoıylmaıdy. Sol sekildi iri saýda ortalyqtarynda ornalasqan dárihanalar da jumysyn jalǵastyrady. Qoǵamdyq tamaqtaný oryndary jumys ýaqytyn qysqartýy kerek. Dálirek aıtqanda, saǵat 22:00-ge deıin ashyq bolady. Kelýshilerdiń sany 50-den aspaýy tıis. Terezeler barynsha ashyq bolǵany durys. Qyzmet kórsetý salasyndaǵy barlyq nysandarda, sonyń ishinde sán salondary men atelelerde saǵat saıyn zararsyzdandyrý jumysyna den qoıýǵa keńes beremiz. Bólmeni jıi jeldetip otyrǵan durys. Gıgıenalyq maqsatta sanıtaızerler ornatqan artyq etpeıdi, – dedi B.Sultanov.
Aýyl sharýashylyǵy mınıstrligi tarapynan elimizde áleýmettik azyq-túlik taýarlarynyń jetkilikti mólsherde bolýyn qadaǵalaý kúndelikti júrgizilip jatyr dedi tıisti vedomstvo basshysy. Bul baǵyttaǵy jumystary oblys ákimdikteri jáne jaýapty organdardyń udaıy baqylaýynda dep sendirdi spıker.
– Veterınarlyq jáne fıtosanıtarlyq qyzmet barlyq saýda oryndarynda shtattyq rejimde jumys isteýde. Qosymsha koronavırýsqa qarsy agroónerkásiptik ónimder tranzıtine shekteý qoıylmaıdy. Eýrazııalyq odaq jáne úshinshi elderden kólikterdiń barlyq túrimen ónimderdi tasymaldaýǵa ruqsat berilgen. Biraq Eýrazııalyq odaq jáne úshinshi elderdiń shekarasynda veterınarlyq jáne fıtosanıtarlyq beketterinde baqylaý kúsheıtildi. Búginde elimizdiń shekarasynda 119 beket bar. Onyń 64-i Reseı shekarasynda, 55-i Qyrǵyzstanmen, 50-i Qytaımen shekarada ornalasqan. Sondaı-aq О́zbekstan men Túrkimenstan shekarasynda baqylaý beketteri kúsheıtilgen rejimde jumys isteýde. Kelip jatqan taýarlar hımııalyq óńdeýden ótkizilip jatyr. Barlyq qajetti ilespe jáne ruqsat qaǵazdar, mysaly tranzıtke, ımportqa, eksportqa beriletin qujattar kúndelikti tártipke saı beriledi, – dedi S.Omarov.
