– Nege ashyq aýadaǵy is-sharalar barysynda aýrý juqtyrý qaýpi týyndaýy múmkin? Sportshylarǵa ne isteý kerek, jattyǵýdy jalǵastyrýǵa bola ma?
– Kez kelgen jappaı oqıǵalar (máselen, «Almaty marafony» 18 myńǵa jýyq qatysýshydan quralǵan) – bul aýrý juqtyrýdyń yqtımal múmkindigi. Vırýs belgileri árdaıym aıqyn kórine bermeıdi. Adamdardyń arasynda aýrý juqtyrǵan adam bolýy múmkin, sondyqtan jaqyn mańdaǵylarǵa úlken qaýip tóndiredi, – deıdi Almaty qalalyq jedel járdem qyzmetiniń jedel bóliminiń aǵa dárigeri Aleksandr Lazarev. – Soǵan qaramastan, men sportpen shuǵyldana berýdi jáne taza aýada ózdiginen jattyǵýdy usynamyn.
Dene belsendiligi ımmýnıtetti kúsheıtedi, al bul bolsa sizdiń vırýsqa qarsy basty qorǵanysyńyz. О́zińizdi nashar sezinseńiz, jattyǵýlardy keıinge qaldyryp, dárigerge (telefon arqyly) habarlasý kerek. Jeke gıgıenaǵa kóńil bólińiz, smartfondy jáne turaqty túrde paıdalanatyn basqa da zattardy (qulaqqap, kompıýter, jumys ústeli, pýlsometrler) únemi óńdep otyryńyz.
– Engizilgen sórelik jarnalar qatysýshylarǵa qaıtaryla ma?
– Qazir sórelik jıyntyqtardy óndirý aıaqtalady, sondyqtan tirkelgen qatysýshylar jarna somasynyń 50%-yn daıyn sórelik jınaq, jeńil jeıde (ony satyp alǵan jaǵdaıda) jáne fınısher medali túrinde ala alady. Al engizgen somasynyń ekinshi jartysy bolsa qatysýshynyń kelisimimen 2020 jylǵa josparlanǵan «Almaty marafony» qaıyrymdylyq maqsattaryn júzege asyrýǵa baǵyttalatyn bolady.
Qatysýshy aqshany qaıtaryp alǵysy kelse, ol bizdiń almatymarathon.kz saıtymyzda erteń, 17 naýryzda paıda bolatyn aqshalaı qarajatty qaıtaryp alýǵa arnalǵan arnaıy ótinimdi toltyryp, bizge vozvrat@almaty-marathon.kz mekenjaıyna 31 naýryz, saǵat 23.59-ǵa deıin jóneltýi tıis. Uıymdastyrý komıteti kelip túsken ótinimderdi óńdegennen keıin, sórelik jınaqtar qurastyrylady, jáne 20 sáýirden bastap jınaqtar beriledi jáne suraý boıynsha aqshalaı qarajat qaıtarylady, – dep jaýap berdi «Almaty marafony» dırektory Saltanat Qazybaeva.
- «Almaty marafony» 2020 úshin qandaı qaıyrymdylyq maqsattaryn qoıdyńyz?
– Biz is-sharany ótkizbeý, oǵan muqtaj adamdarǵa kómek kórsetýden bas tartýǵa sebep bolmaýy tıis dep esepteımiz. Sondyqtan da, barlyq belgilengen qaıyrymdylyq maqsattaryn júzege asyrýdy jón dep sheshtik. Bıyl 5 is-shara bolady. «Keńes» múgedekterdiń qoǵamdyq birlestigi úshin balalar alańshasyn jabdyqtaýdy, Esik qalasyndaǵy aqyl-esi kemis balalarǵa arnalǵan oblystyq arnaıy mektep-ınternatta fýtbol alańyn salýdy, «SOS Almaty Balalar aýylynda» vorkaýtqa arnalǵan alańshalar salýdy, damýdaǵy erekshelikteri bar balalarmen jumys isteý boıynsha «Amalııa» ortalyǵynyń sensorlyq ıntegrasııaǵa arnalǵan jabdyqtar satyp alýdy, sondaı-aq Talǵar qalasyndaǵy «Nur» balalar úıinde sporttyq alańsha salýdy josparlap otyrmyz. Josparlanǵan qaıyrymdylyq kómektiń jalpy somasy – 35 000 000 teńge, – dep habarlady Saltanat Qazybaeva.
