Jarlyqqa sáıkes Qazaqstan Úkimetine salyq tóleýshilerdiń sanattaryn, salyq mólsherlemelerin jáne salyq salý tártibin anyqtaý tapsyryldy. R. Dálenov atap ótkendeı, Ulttyq ekonomıka mınıstrligi usynystar ázirledi.
«Iri saýda nysandaryn, kınoteatrlardy, teatrlardy, kórmelerdi, sport nysandaryn qoldaý úshin salyqtyq yntalandyrý berý usynylady. Bul – zańdy tulǵalar men jeke kásipkerlerdi múlik salyǵynan bir jylǵa bosatý, bir toqsan ishinde salyq bereshegi boıynsha ósimpuldy esepteýdi toqtata turý jáne salyq eseptiligi men esep aıyrysýlardy berý merzimin úshinshi toqsanǵa aýystyrý», — dedi mınıstr.
Usynylyp otyrǵan sharalardy Memleket basshysymen keliskennen keıin Úkimet jaqyn arada qabyldaıtyn bolady.
Sonymen qatar R. Dálenov tabystyń joqtyǵyna baılanysty iri meıramhanalar men basqa da ýaqytsha jabylǵan nysandardyń aqsha shyǵynynyń aldyn alý, jalǵa alý aqysyn tóleý, qyzmetkerlerdiń jalaqysyn berý máselesin qalaı eńserýge bolatynyn túsindirdi. Onyń aıtýynsha, bul máseleniń birneshe sheshimi bar.
«Birinshiden, eger jalaqy eseptelmese, onda jalaqydan tabys salyǵy ustalmaıdy. Bul qoldanystaǵy norma. Ekinshiden, eger jalaqy eseptelse, biraq kassalyq alshaqtyqqa baılanysty salyq mindettemelerin oryndaýǵa múmkindik bolmasa, salyq bereshegine ósimpuldy eseptemeýdi engizý usynylady. Bul ýaqytsha norma. Úshinshiden, osy jyly jalpy belgilengen rejımde jumys isteıtin jeke kásipkerlerdi tabys salyǵynan bosatý usynylady. Bul qarajatty únemdeýge jáne olardy jalaqy tóleýge jumsaýǵa múmkindik beredi», — dedi R. Dálenov.
Sonymen qatar onyń aıtýynsha, ShOB-tiń jekelegen sanattaryna arnalǵan salyqtyq yntalandyrýlar da úı-jaı ıeleriniń jaldaý mólsherlemesin tómendetýine múmkindik beredi.
