Qujattyń negizgi mazmuny – Qazaqstan Respýblıkasynyń Prezıdenti jarııalaǵan eldegi tótenshe jaǵdaı kezeńinde, densaýlyq saqtaý salasyn qoldaý. Naqtyraq aıtqanda, eldegi epıdemııalogııalyq jaǵdaıdyń kúrt qıyndaǵan kezeńinde aýyrtpalyqty moıyndaryna artqan 5000-nan astam medısına qyzmetkerleri Tele2, Altel, Kcell jáne Activ baılanys jelilerinde tegin, toqtaýsyz baılanyspen jáne mobıldi ınternetpen qamtamasyz etiletin bolady. Aıta ketý kerek, bul bastama Qazaqstannyń iri telekommýnıkasııa operatoryna tıesili.
«Qazaqtelekom» kompanııalar toby qalyptasqan jaǵdaıdyń qıyndyǵyn barynsha sezinip otyr. Koronavırýspen kúreste dárigerlerdiń aldyńǵy shepte júretini belgili. Olar qaýyrt rejımde jumys isteýde. Osy rette medısına qyzmetkerleriniń únemi baılanysta bolýy mańyzdy. Qazirgi tańda shuǵyl túrde bul bastamany júzege asyrý barysyn úılestirip jatyrmyz. Sonymen qatar Qazaqstan Respýblıkasynyń Densaýlyq saqtaý mınıstrliginen medısınalyq qyzmetkerler tizimin alý isi bastaldy, – dep atap ótti «Qazaqtelekom» AQ basqarma Tóraǵasy Qýanyshbek Esekeev.
Koronavırýs anyqtalǵan ózge elderdiń tájirıbesine súıensek, pandemııa kezeńinde medısınalyq mekemelerge artylatyn júkteme óte joǵary bolady. Atap óteıik, elimizdiń medısınalyq qyzmetkerlerin indetpen kúreske jumyldyrý baǵytynda, sapaly baılanys mańyzdy faktor bolyp tabylady.
«Mobaıl Telekom-Servıs» JShS Bas Dırektory Roman Volodınniń aıtýynsha, elde jarııalanǵan tótenshe jaǵdaı merziminde Tele2 jáne Altel abonentteri úshin arnaıy sharalar kesheni daıyndalýda.
Osyndaı kúrdeli kezeńde dárigerler úshin úzdiksiz ári sapaly baılanystyń qanshalyqty mańyzdy ekenin túsinemiz, sondyqtan uıaly baılanys qana emes, mobıldi ınternet pen aýdıo servısti de tegin qamtamasyz etýge daıynbyz, – dedi ol.
«Kcell» AQ basqarma tóraǵasy Kaspars Kýkelıs azamattardyń densaýlyǵy men qaýipsizdigine qatysty máseleden tys qalmaıtynyn málim etti.
Qazirgi tańda el tótenshe jaǵdaı rejımine kóshken kezde, uıaly baılanys operatorlaryna júktelgen mindet te joǵarylaıdy. Biz baılanys turaqty bolýy úshin 24/7 rejıminde jumys istep jatyrmyz. Biz úshin osyndaı syn saǵatynda dárigerlerge qoldaý kórsetý úlken mártebe. Birlese otyryp, biz bárin jeńemiz, – dedi ol.
