Senatorlar «Qazaqstan Respýblıkasy men Brazılııa Federatıvtik Respýblıkasy arasyndaǵy qylmystyq ister boıynsha ózara quqyqtyq kómek týraly shartty ratıfıkasııalaý týraly» zań jobasyn qarady.
Depýtat Vladımır Volkov qujatty tanystyra kelip, sharttyń ratıfıkasııalanǵany Qazaqstanda qylmysqa qarsy kúreste eki eldiń tıimdi yntymaqtastyǵyn arttyrýǵa baǵyttalǵan halyqaralyq quqyqtyq tártipti qalyptastyrýǵa yqpal etetinin atap ótti.
Otyrystyń kún tártibi aıasynda «Qazaqstan Respýblıkasy men Brazılııa Federatıvtik Respýblıkasy arasyndaǵy adamdardy ustap berý týraly berý týraly shartty ratıfıkasııalaý týraly» zań jobasy da talqylandy. Bul shart shet memlekettiń aýmaǵynda sottan jasyrynyp júrgen adamdardy ekstradısııalaý úshin quqyq qorǵaý organdaryna qosymsha múmkindikter beredi.
Depýtattar sondaı-aq Qazaqstan Respýblıkasy men Brazılııa Federatıvtik Respýblıkasy arasyndaǵy sottalǵan adamdardy berý týraly shartty da ratıfıkasııalady. Bul qujat bas bostandyǵynan aıyrý jazasyn óz elinde óteý múmkindigin beredi jáne áleýmettik ońaltý men qoǵamǵa kirigýin jedeldetedi.
Senatorlar 2014 jylǵy 15 tamyzdaǵy Kólik quraly pasportynyń (kólik quralynyń shassıi pasportynyń) jáne ózdiginen júretin mashına jáne tehnıkanyń basqa da túrleri pasportynyń biryńǵaı nysandaryn engizý jáne elektrondyq pasporttar júıelerin uıymdastyrý týraly kelisimge Armenııa Respýblıkasynyń qosylýy týraly hattamany qarady jáne ratıfıkasııalady.
Senator Mıhaıl Bortnık zań jobasyn tanystyra kelip, qaǵaz túrindegi pasporttardy elektrondyq nusqaǵa kóshirý EAEO aýmaǵynda belgilengen qaýipsizdik talaptaryna sáıkes kelmeıtin tehnıkany aınalymǵa shyǵarýǵa jol bermeıtinin atap ótti.
Palata depýtattary 2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy Eýrazııalyq ekonomıkalyq odaq týraly shartty, Eýrazııalyq ekonomıkalyq odaqtyń quqyǵyna kiretin jekelegen halyqaralyq sharttardy jáne Eýrazııalyq ekonomıkalyq odaq organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrda qol qoıylǵan hattamaǵa ózgeris engizý týraly hattamany ratıfıkasııalaý týraly máseleni de qarady.
Depýtat Álimjan Qurtaevtyń aıtýynsha, qaralyp otyrǵan zań jobasynda Qyrǵyz Respýblıkasynyń memlekettik shekarasyndaǵy ótkizý pýnktterin jaılastyrý jáne materıaldyq-tehnıkalyq jabdyqtaý merzimin taǵy 2 jylǵa uzartý usynylyp otyr.
Senat Tóraǵasy Darıǵa Nazarbaeva otyrysty qorytyndylaı kelip, depýtattardy tótenshe jaǵdaı kezeńindegi Senat jumysynyń reglamenti týraly habardar etti.
Atap aıtqanda, tótenshe jaǵdaı bolǵan kezeńde barlyq issaparlar men josparly kópshilik is-sharalary toqtatylady. Zańdar boıynsha jumystar jalǵasa beredi. Bul rette depýtattarǵa palata men komıtetterdiń otyrystaryna shaqyrylǵandardyń sanyn múmkindiginshe shekteý usynylyp otyr.
Apparattyń 70-ten astam qyzmetkeri úıden isteıtin jumys tártibine kóshirildi, qalǵan qyzmetkerler úshin qysqartylǵan jumys kúni belgilendi. Senat ǵımaratynda kúnine birneshe márte qajetti sanıtarlyq-epıdemıologııalyq jumystar júrgizilýde.
«Memlekettiń mindeti - azamattarymyzdyń ómiri men densaýlyǵyn saqtaý, ekonomıka men tutyný naryǵynyń jumys isteýin qamtamasyz etý. Juqpaly dertpen nátıjeli kúresý úshin erik-jiger men sheshimdi bolý kerek. Degenmen saqtyq ta kerek. Bizge erteńgi kúnge senimmen qarap, boıymyzdaǵy úreı men kúdikten arylý qajet. Biz – talaı synda shynyqqan myqty halyqpyz. Biz bárin jeńemiz», - dedi D.Nazarbaeva óz sózinde.
Senat basshysy azamattardyń jumyspen qamtylýy men tabystary máselesine bólek toqtaldy.
«Tótenshe jaǵdaı men karantın, ókinishke oraı, iskerlik belsendilikti baıaýlatýǵa alyp keledi. Kóptegen adamdar ýaqytsha jumyssyz ǵana emes, sondaı-aq ómir súrýge arnalǵan qarajatsyz da qalýy múmkin. Almaty qalasynda turaqty nemese ýaqytsha jumys isteıtin Almaty oblysynyń turǵyndary jónindegi máseleler bar ekeni bizge belgili. Bul 500 myń shamasyndaǵy adam, olarǵa otbasy múshelerin qosyńyz, biz problemanyń aýqymyn tıisti mólsherde kóre alamyz. Memlekettik organdar, depýtattar bul jaǵdaıǵa basa nazar aýdarýy tıis dep esepteımin. Qalyptan tys, batyl sheshimder qajet», - dedi D.Nazarbaeva.
Senat Tóraǵasynyń aıtýynsha, «juqpaly dertpen nátıjeli kúresý úshin erik-jiger men sheshimdi bolý kerek. Degenmen saqtyq ta kerek».
Senatorlar otyrys sońynda depýtattar men Senat apparatynyń bir kúndik eńbekaqysyn vırýspen kúres qoryna aýdarý týraly sheshim qabyldady.
