Qurylysshy bedelin kóterý qajet

Sál aıaldap, syrttaı qyzyǵa qaraısyz. «Zaman osylardiki ǵoı. Jumys kóp. Úıden úı, qaladan qala turǵyzyp jatyr, kúrep taýyp jatqan shyǵar» degińiz ke­le­di de, ony sol sátte-aq umy­typ, jó­­nińizge kete barasyz. Syrt kóz­ge barlyǵy jaqsy ǵoı. Biraq eli­mizde jyl sanap qarqyn alyp kele jatqan qurylys sala­syn­da da qordalanyp qalǵan má­sele kóp. Eń áýeli sapaly kadr az. Qurylysshy daıarlaıtyn kásibı oqý oshaqtary sapaly maman shyǵara almaı otyr. Qu­ry­lys­shynyń aılyǵy tómen, ta­bysy turaqsyz, qysta kóbine ju­myssyz otyrady. Tender ba­ry­­synda jergilikti qurylys kom­panııalaryna basymdyq be­rilmeıdi. Nátıjesinde, ony iri qalalardaǵy alpaýyt kompanııalar utyp alyp, jergilikti kásiporyn jıi úlesten qaǵy­lady. Jergilikti jerde qu­ry­­lys taýarlaryn óndirýge ákim­shi­lik kedergi kóp. Osy já­ne qu­rylys salasyndaǵy basqa da kúrmeýli máselelerdiń shet ja­ǵasy Qostanaıda ótken «Qa­zaqstan qurylysshylar odaǵy» oblystyq fılıalynyń eseptik-saılaý konferensııasynda sóz boldy.

Búginde odaqtyń oblystyq fı­lıalynda 20 shaqty qurylys kompanııasy, sondaı-aq qurylys materıaldaryn shyǵaratyn, saý­dalaıtyn, tasymaldaıtyn on shaqty kásiporyn bar.

– Bizdiń qurylǵanymyzǵa kóp bola qoıǵan joq. Basty maq­satymyz – qurylys kompa­nııa­la­rynyń basyn biriktirý. Sol arqyly bá­rimizge ortaq kúrdeli másele­lerdiń sheshilý joldaryn birlese izdestirý, ózara tá­jirıbe almasý, qurylys salasyna mamandanǵan shaǵyn jáne orta kásipkerlerdiń quqyǵyn qorǵaý. Qazir negizinen qurylys kompanııalarynyń basshylarymen kezdesýler ót­kizip, túsindirý, nasıhat­taý ju­mystaryn júrgizip jatyrmyz. Qazir elimizde júrip jatqan qu­rylys kóp, biraq qurylysshy az. Biz kóp bolyp birigip, osy má­seleni kóterýimiz kerek. Iri qu­rylys kompanııalarynyń janynan qurylysshy daıarlaıtyn oqý oshaqtary, tipti bolmasa shaǵyn oqý synyptary ashylýy kerek. Kezinde bolǵan, al búginde umytylǵan bir jaqsy dástúr bar. Bul qurylysshynyń mártebesin kóterý máselesi. Qa­zirgi qury­lysshynyń jaǵdaıy máz emes. Olardyń jumysy ja­ýapty ári aýyr. Sondyqtan áleýmettik jeńildikter qaras­tyrylýy kerek. Burynǵy «Eń úzdik tas qa­laýshy», «Eń úz­dik sylaqshy» de­gen sııaqty baıqaýlar uıym­das­tyryp, yntalandyrý sharalaryn tiriltken durys. Qu­rylys kompanııasynda jumys isteıtin qarapaıym maman erteń osy kásiporyn ózin baspa­­namen qamtıtynyna se­nim­di bolýy kerek. Sonda ǵana jas­tar qurylys salasyna shynaıy qyzyǵýshylyq bildire bastaıdy, – dedi oblystyq fılıal dırektory Ýálıhan Nysanov.

QOSTANAI