Koronavırýs • 20 Naýryz, 2020

Qaraǵandyda eki adamnyń koronavırýs juqtyrǵany rastaldy

100 retkórsetildi

Qaraǵandy qalasyndaǵy óńirlik kommýnıkasııalar qyzmetinde ótken brıfıngte oblystyq densaýlyq saqtaý basqarmasynyń basshysy Erjan Nurlybaev kenshiler astanasyna Mınsk qalasynan ushyp kelgen eki jolaýshydan koronavırýs aýrýynyń belgisi tabylǵanyn rastady.

Aıta ketetin bir jaıt, bortynda 67 jolaýshy bolǵan atalǵan ushaq Nur-Sultan qalasyna qonýy tıis bolatyn. Alaıda, bas qaladaǵy karantındik rejım boıynsha týyndaǵan qıyndyqtarǵa baılanysty ushaq Qaraǵandy áýejaıyna qondyrylǵan edi.

– Nur-Sultan-Mınsk avıareısimenen ushyp kelgen eki jolaýshynyń koronavırýs ınfeksııasyn juqtyrǵany resmı túrde anyqtaldy. Qazir olardyń jaǵdaıy qanaǵattanarlyq deńgeıde. Jolaýshylardy qarsy alý kezinde qajetti qaýipsizdik is-sharalarynyń bári saqtaldy. Avtobýs ushaq baspaldaǵyna deıin baryp, jolaýshylardyń áýejaı ǵımaratyna kirý joly kesilip, olar birden kólikke otyrǵyzyldy. Azamattar ushaq ishinde tekserilip, odan keıin baryp karantındik gospıtalderge jetkizildi. Jolaýshylar bólimshelerge bólek jatqyzyldy. Qazirgi tańda, ınfeksııa juqtyrǵan eki adamnyń der kezinde oqshaýlandyrylǵanyn eskere otyryp, oblys tóńireginde karantın jarııalaýǵa negiz joq, – dedi oblystyq densaýlyq saqtaý basqarmasynyń basshysy.

Sondaı-aq, Erjan Nurlybaev koronavırýs juqtyrǵan eki jolaýshynyń Qaraǵandy oblysynyń turǵyndary emestigin atap ótti.

Oblystyq taýarlar men qyzmetterdiń sapasy men qaýipsizdigin baqylaý departamentiniń basshysy Qanat Asqarov qazirgi tańda Qaraǵandy oblysynda alty sanıtarlyq beket jumysy  uıymdastyrylǵan habarlady. Munda táýlik boıy kezekshilik etetin arnaıy brıgada azamattardyń dene qyzýyn tekserip, basqa da sanıtarlyq aldyn alý is-sharalaryn júzege asyrady.

Oblystyq kásipkerlik basqarmasynyń basshysy Tatıana Ablaeva óńirde azyq-túlik baǵalarynyń baqylaýda ekenin jetkizdi. Onyń aıtýynsha, Reseı jáne Belarýs elderinen ákelinetindikten, qanttyń ǵana baǵasy qymbattaǵan. Sondaı-aq, ol iri saýda oryndary jumysyn ýaqytsha toqtatqan kezde jalǵa alýshylardan aqy almaıtynyn jetkizdi. Bul týrasynda oblys kásipkerlerimen kelisimge qol jetkizilgenin atap ótti ol.

Brıfıngtiń sońynda oblystyq densaýlyq saqtaý basqarmasynyń basshysy Erjan Nurlybaev ýaqytpen sanaspaı jumys istep  júrgen medsınalyq qyzmetkerlerge alǵys aıtyp jáne oblys turǵyndaryn sabyrly bolýǵa shaqyrdy.

Qaraǵandy oblystyq polısııa departamentiniń resmı ókili Jańataı Sembekov jalǵan qaýesetterge senbeı, tek qana memlekettik organdardyń resmı saıttaryndaǵy aqparattarǵa júginýge úndedi jáne áleýmettik jelilerde jalǵan jáne úreı týdyratyn habar taratqandardyń zań boıynsha jaýapkershilikke tartylatynyn eske saldy.

Eske salar bolsaq, bortynda koronavırýs juqtyrǵan eki jolaýshy bolǵan ushaq Qaraǵandy áýejaıyna 18 naýryz kúni Mınsk qalasynan ushyp kelgen bolatyn.

Qaraǵandy oblysy

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar