Álem • 20 Naýryz, 2020

AQSh Prezıdenti qosymsha ókilettilikterge ıe boldy

135 retkórsetildi

AQSh Prezıdenti Donald Tramp ónerkásipti koronavırýspen kúreske jumyldyrý úshin qosymsha ókilettikterdi jaýapkershiligine alatynyn málimdedi. Bul aqparatty keshe golos-ameriki.ru taratty.

Sarapshylar Donald Tramptyń mundaı kúrdeli sheshimdi qabyldaýyna geosaıası álemdegi kúrdeli jaǵdaılar sebep bolǵanyn aıtyp jatyr. «Soǵys ýaqytynyń prezıdenti» dep ataı otyryp, Tramp 1950 jylǵy qorǵanys ındýstrııasy týraly zańnyń artyqshylyǵyn paıdalanatynyn málimdedi. Qorǵanys maskalary, ventılıatorlar jáne basqa da ónimderdiń jetispeýshiligin toltyrý úshin salany baǵyttaýǵa tapsyrma berdi. AQSh Prezıdenti bul sheshimin «aýrýhanalardyń jaǵdaıy baqylaýdan shyǵyp ketse, bárine daıyn bolýyn qamtamasyz etedi» dep túsindirdi. 

Sarapshylar Koreıa soǵysy kezinde qabyldanǵan zań prezıdentke kásiporyndardy óndiristi keńeıtýge jáne ómirlik mańyzdy materıaldardy shyǵarýǵa ókilettikter beretinin aıtyp jatyr. Bul zań sońǵy ret 2017 jyly Pýerto-Rıkodaǵy daýyldan keıin azyq-túlik pen basqa da qajetti zattardy jetkizýge kelisimsharttar jasaýdy jedeldetý úshin qoldanylypty.  

«Biz soǵys jaǵdaıynan da aýyr kezeńde turmyz, soǵys kezinde qarsylasyńnyń jaǵdaıyna qarap ózińniń basym tustaryńdy anyqtaýǵa bolady. Biz qazir shekaralardy moıyndamaıtyn daýasyz dertpen betpe-bet turmyz» degen Donald Tramp koronavırýspen kúresti Ekinshi dúnıejúzilik soǵys kezinde qabyldanǵan sharalarmen salystyrdy. Aldaǵy ýaqytta bolatyn shyǵyndarǵa daıyn bolýy kerektigin eskertti.  

Osy jıynda AQSh Prezıdenti jekelegen shtattardyń gýbernatorlarymen kezdesip, aımaqtardyń ahýalymen tanysty. 

Kalıfornııa gýbernatory áskerı jaǵdaıdy engizý múmkindigi týraly eskertse, Nıý-Iork meri 8,6 mıllıon turǵynǵa úılerinen shyǵýǵa tyıym salynatynyn bilýge daıyn bolý kerektigin aıtty.

Ekonomıster buǵan deıin AQSh Prezıdentimen kezdesip, el ekonomıkasynyń edáýir bóligi toqtap qalýy múmkindigin eskertken bolatyn.

D. Tramp Turǵyn úı jáne qala qurylysy mınıstrligi adamdardy áleýmettik turǵyn úıdi paıdalaný quqyǵynan aıyrýǵa jáne olardy shyǵarýǵa ýaqytsha tyıym salatynyn aıtty.

AQSh Prezıdenti osy jıynda halyqqa qarjylyq kómek kórsetý jospary týraly ashyp aıtyp, aldaǵy eki aıda eki mıllıardtan 500 mıllıard dollar tóleýdi josparlap otyrǵanyn habarlady.  

Árbir otbasyǵa beriletin qarjylaı kómektiń qansha ekeni áli anyqtalǵan joq. Biraq ol otbasynyń tabysyna qarap beriletin bolady.

Álemdik ekonomıkanyń 20 paıyzyn berip otyrǵan AQSh-tyń mundaı sheshimge kelýiniń sebebi salmaqty bolyp tur.

Ford, General Motors jáne Fiat Chrysler, sondaı-aq, Honda jáne Toyota AQSh, Kanada jáne Meksıkadaǵy zaýyttarynyń jabylatyny týraly habarlady. Detroıttaǵy Úlken Úshtiktiń zaýyttarynyń jabylýy 150 myńǵa jýyq jumysshynyń jumyssyz qalýyna ákelip soǵaıyn dep tur. AQSh Prezıdenti jumyssyz qalǵan árbir azamat memlekettiń qamqorlyǵynda bolatynyn taǵy da málimdedi. 

Amerıka Qurama Shtattarynda 7,700-den astam adam koronavırýspen tirkeldi. Kúni búginge deıin kem  degende 138 adam qaıtys boldy.

Olardyń jartysyna jýyǵy Vashıngton shtatynda, onda Sıetldiń shetindegi qarttar úıiniń ondaǵan turǵyny qaıtys bolǵan.

Epıdemııanyń memleketaralyq shekaralardan shyǵyp ketýi memleket basshylarynyń ókilettilikterin  keńeıtý týraly sheshim qabyldaýyn talap etip jatyr.  

Apta basynda bizdiń Prezıdentimiz Qasym-Jomart Toqaev daǵdarys jaǵdaıynda eldegi áleýmettik-ekonomıkalyq turaqtylyqty qamtamasyz etý sharalary týraly Jarlyqqa qol qoıdy. 

Jarlyq mátininde el Prezıdentine «memlekettiń ishki jáne syrtqy saıasatynyń negizgi baǵyttaryn aıqyndaıtyn joǵary laýazymdy tulǵa retinde, memlekettik organdarǵa, onyń ishinde áleýmettik salada ár túrli retteýdi qarastyratyn aktiler qabyldaýǵa nemese nusqaýlar berýge quqyly» delingen.

Sarapshylar Memleket basshysynyń mundaı tótenshe jaǵdaıda barlyq jaýapkershilikti ózine alýyn halyqaralyq zań mindetteıtinin aıtyp jatyr.

Qazaqstannyń Tuńǵysh Prezıdenti – Elbasy Nursultan Nazarbaev keshegi halyqqa joldaǵan Joldaýynda «Basqasha aıtqanda, biz qazir «dúleı daýyl» dep sıpattaýǵa bolatyn úlken qaýip-qater aldynda turmyz. Qazirgi ahýal bir jaǵynan 1990 jyl­dardyń basyndaǵy jaǵ­daıǵa uq­saıdy.Ol kezde biz shyn máninde óte qıyn jaǵdaıda bolǵan edik. Osyndaı aýyr kezeńde men barlyq qazaqstandyqtardy el Prezıdenti Qasym-Jomart Toqaev pen Úkimet tarapynan iske asyrylyp jatqan shu­ǵyl sharalardy qoldaýǵa shaqy­ra­myn» dedi.

Sońǵy jańalyqtar

Túıe súti Qytaıǵa eksporttaldy

Álem • Búgin, 09:45

Erlikti dáripteıtin qomaqty qor

Rýhanııat • Keshe

Eki qylmystyq top ustaldy

Aımaqtar • Keshe

Uqsas jańalyqtar