Mınıstrdiń sózin ilip áketken áleýmettik jeli qoldanýshylary jurtty jappaı medısınalyq qyzmetkerlerdi qoldaýǵa shaqyrdy. Al keshe kópqabatty úıdiń turǵyndary keshki saǵat týra 21.00-de balkonǵa shyǵyp, koronavırýspen kúndiz-túni kúresip jatqan aqhalattylarǵa dý qol shapalaqtap, qoshemetin bildirdi. Mundaı qoshemet úsh kún boıy jalǵasady.
Áleýmettik jelide arnaıy qurylǵan toptyń aksııasyn qarapaıym halyq ǵana emes, Úkimet músheleri, elge tanymal azamattar da qoldap, jan-jaqtan alǵys aıtty. Al mınıstr Fahrettın Koja bolsa, áleýmetik jeli paraqshasyna: «Rahmet, Túrkııa. Sizderdiń qoldaýyńyz bizdi jigerlendirip, kúsh syılady» dep jazdy.
Dúnıejúzin dúrbeleńge salǵan pandemııa ásirese, aqjeleńdiler jumysyna aýyr tıip tur. Bul dertti medısınasy damyǵan alpaýyt elderdiń ózi aýyzdyqtaı almaı, dármensizdik tanytýda. Sondyqtan biz de aty jaman aýrýmen betpe-bet kelip otyrǵan medısınalyq qyzmetkerlerimizge qoldaý bildireıik. Olar úshin eń basty qoldaýymyz – kópshilik oryndarǵa barýdy azaıtyp, múmkindiginshe úıde otyrý. Bir mezette kóp adam aýyrsa, dáriger de, medbıke de, tıisti qural-jabdyq ta jetpeı qalýy múmkin. Bul aınalyp kelip, halqymyzdyń densaýlyǵyna qaýip tóndiredi. Eshqaıda barmaı úıde otyrý, aınalańdy taza ustaý, gıgıena saqtaý sekildi qarapaıym qaǵıdany este ustasaq, indetten de jeńil ótetinimiz anyq.
Qymbat TOQTAMURAT
